2020 йил коронавирус туфайли АҚШда давлат қарзи ва корпорациялар қарзи рекорд даражагача ўсиши мумкин. Бу ҳақда The Washington Post нашри ёзмоқда.
Федерал бюджет дефицити 4 трлн долларгача кўтарилиши мумкин, бундай ҳолат 1945 йилдан бери кузатилмаган. ExxonMobil ва Walgreens каби йирик компаниялар кредит бўйича линияларни сарфлаб бўлишган, аммо ҳозир ҳам қарзларга эҳтиёж сезмоқда.
Тадбиркорлар олдида катта масала турибди: кредит олиш ёки ходимларни ишдан бўшатиш. Америкадаги банклар фуқаролардан талабалар учун берилган ва кредит карталари орқали олинган қарзларни қайтаришни талаб қилишмоқда.
«Ҳозир хавотирли вақт. Замонавий тарихда бўлмаган қарзлар даражаси ҳақида гап кетмоқда. Ортга қайтиб бўлмайдиган вазиятга яқинлашяпмиз», — дея фикр билдирган Принстон университети профессори Атиф Миан.
Федерал резерв тизими иқтисодиётни қўллаб-қувватлаш учун асосий ставканинг даражасини 0 фоизгача туширди ва ўз портфелига қўшимча 2 трлн долларни қўшди — Буюк депрессиянинг сўнгги тўрт йилида ҳам шунча маблағ киритилган.
АҚШ молия вазири Стивен Мнучин олдинроқ ҳукумат пандемия сабабли зарар кўраётган бизнесларни қўллаб-қувватлаши кераклигини таъкидлаган эди.
«Ставкалар ҳозир шу даражада пастки, қарз олиш жуда арзон. Келажакда биз дефицитни йўқотамиз албатта, лекин ҳозир бу ҳақда қайғуришнинг вақти эмас», — деган вазир.
Халқаро валюта жамғармасининг ҳисоботига кўра, АҚШ ЯИМи 2020 йил охирига келиб 5,9 фоизга қисқараши кутилмоқда.
