Ўзбекистон соғлиқни сақлаш вазири Алишер Шодмонов «Ўзбекистон 24» канали орқали мамлакатда COVID-19 инфекциясига чалинган беморлардан бошқа шахсларга юқиш ҳолатлари ҳақида маълумот берди.
«Асосан хорижда ишловчи шахслар Ўзбекистонга қайтгандан сўнг оила аъзоларига касалликни юқтириб қўйган. Бунга бир қатор мисоллар келтириш мумкин», — деди вазир.
Хусусан, 15 март куни хориждан келган фуқаро 15 кишига касалликни юқтирган. 27 март куни Андижонда касаллиги аниқланган шахсдан эса ота-онасига коронавирус юққан. Унинг отаси яна 36 ҳамкасбига коронавирусни ўтказган. Ҳамкасбларидан бири 4 нафар қариндошига юқтирган. Ундан ташқари яна мулоқотда бўлганлардан 3 кишига касаллик ўтган. Шундай қилиб, бир кишидан 46 нафар одамга коронавирус тарқаган. «Афсуски бу беморимиз касаллик аломатлари кўрина бошлаганда ҳам шифокорларга хабар бермаган», — деди Алишер Шодмонов.
Тошкент шаҳридаги бемор турмуш ўртоғи билан Туркияга бориб келган. Улар оиласидаги 8 нафар шахсга касалликни юқтирган. Барчаси ҳозирда даволанмоқда.
Тошкент вилоятидаги яна бир бемор эса 26 мартда касаллик бошланганига қарамай 5 кун давомида уйида ётган. У фақат 30 март куни шифокорларга мурожаат қилган ва у даволашга олинган. Айни вақтда ушбу бемор сунъий нафас берувчи (ИВЛ) аппаратига улаб қўйилган.
«Тошкент вилоятидаги бошқа бир беморимиз эса йўталиш, тана ҳароратининг кўтарилиши ва хатто нафас сиқишига қарамай тўртта ташкилотга борган. Биз мажбур бўлдик ўша ташкилотларнинг барчасини ёпишга. Бу бемордан 52 киши касалликни юқтирган», — дея маълум қилди вазир.
Вазирнинг қайд этишича, яна бир бемор учта ташкилотда ишлаётган бўлган. У сабабли 100 дан ортиқ инсонлар кузатувга олинган. Бемор касаллик бошланганини билгани ҳолда шунча одам билан мулоқотда бўлган.
«Бу жиноят. Била туриб шунча одамга касални юқтириш хиёнатдир», — деди вазир.
Яна бир фуқаро эса хорижда бўлгандан сўнг 7 нафар оила аъзосига юқтирган. У билан мулоқотда бўлган 153 шахс кузатувда.
Умумий ҳисобда 7 мамлакатдан кириб келган 123 киши ва улар билан мулоқотда бўлганлар туфайли беморлар сони 390 нафарга етди, деди вазир.
Алишер Шодмоновнинг қайд этишича, тўрт нафар бемор ким билан учрашганини сир сақлаган. Фақатгина улар билан мулоқотда бўлганларда иситма чиққандан кейин тиббиёт мутахассислари буни билган.
Яна бир мисол — Туркиядан келган эр-хотинда шамоллаш белгилари бўлган. Аммо улар хориждан келганини айтмаган ва тиббиёт ходимларини чалғитган. Кейинчалик тест ўтказилиб коронавирус аниқлангандан кейин касални яширганларини йиғлаб тан олишган. Натижада бутун оила касалга чалинган.
«Афсуски беморлар орасида касаллик аниқлангандан сўнг ҳам шифокорларга қулоқ солмасдан, ўз билганини қилиб юрганлар учраб турибди. Ўзинг бутун маҳаллага юқтириб бўлдинг, керак бўлса яшириб юрдинг, хиёнат қилдинг, энди ҳеч бўлмаса шифохонага келгандан кейин шифокорларнинг айтганини қилиш керак эмасми? Йўқ, манманлик билан тавсияларга қулоқ солмасдан юрганлар ҳам бор. Мана шундай беморлардан бири ҳозир ИВЛ аппаратига улаб қўйилган, сунъий нафас бериляпти», — дея маълум қилди соғлиқни сақлаш вазири.
Алишер Шодмонов ҳатто оилада ҳам қучоқлашиб кўришмаслик ва ҳамма билан масофада гаплашишни тавсия қилди.
