АҚШ Конгресси Вакиллар палатаси президент Дональд Трамп импичменти учун овоз берди. У икки модда — ваколатини суиистеъмол қилиш ва Конгрессга тўсқинлик қилиш бўйича айбланмоқда, дея хабар қилди Новости РАА.
Парламентда кўпчиликни ташкил этувчи демократлар импичмент учун овоз берган бўлса, республикачилар қарши бўлди. Импичмент учун биринчи модда бўйича 230 киши, жумладан 1 нафар мустақил номзод ёқлаб овоз берган бўлса, 197 киши, шу жумладан 2 демократ қарши овоз берди. Бир киши — Демократлар партиясидан АҚШ президентлигига номзод Тулси Габбард бетараф қолди.
Иккинчи модда бўйича 229 депутат, жумладан 1 нафар мустақил депутат ёқлаб овоз берган бўлса, 198 киши, жумладан 3 демократ қарши бўлди, бир парламентарий бетараф қолди.
Эндиликда импичмент масаласини Сенат кўриб чиқади. Парламент юқори палатаси Трамп устидан суд жараёнини ўтказади. Конгресс юқори палатасида кўпчиликни ташкил этувчи республикачилар эса Трамп импичментига рози бўлмоқчи эмас.
АҚШ президентининг ўзи импичмент жараёнини демократларнинг сиёсий жиҳатдан ўзларини ўзлари ўлдириши деб атади. «Сиз менинг рейтингларимни кўрдингизми?. Улар биринчи кунданоқ менинг импичментимни эълон қилишга ҳаракат қилишди. Улар мен курашни бошламасимдан олдиноқ буни амалга оширишга ҳаракат қилишди», — деди Трамп пайшанба куни Мичиган штатида бўлиб ўтган митингда.
Оқ уй, ўз навбатида, Трамп импичмент жараёнлари доирасида навбатдаги қадамни ташлашга тайёр экани, Сенатда тўлиқ оқланишини маълум қилди.
Демократлар АҚШ президентини Конгресс томонидан тасдиқланган Украинага ҳарбий ёрдам кўрсатиш жараёнини тўхтатиб қўйиб, президент Владимир Зеленскийга ўз рақиби Жо Байденга қарши тергов кўринишидаги хизматларни таклиф этганликда айбламоқда. Трамп рақиблари уни Конституцияни бузгани ва ўз ваколатларини суиистеъмол қилганликда айблаётган бўлсалар, республикачилар улар фикрини қўллаб-қувватлаётгани йўқ.
