25 октябрдан 26 октябрга ўтар кечаси Андижоннинг Сой кўчасида жойлашган Кичик саноат зонаси ҳудудидаги цехларда ёнғин юзага келди, дея хабар қилди ФВВ ЁХББ матбуот хизмати.
Ёнғинни бартараф этилишига 18 та техника жалб этилган. Биринчи бўлинмалар воқеа жойига етиб борганда, DINAR TEXTILE компаниясига қарашли ишлаб чиқариш цехнинг том қисми очиқ аланга билан ёнаётганлиги маълум бўлган. Кўрилган тезкор ҳаракатлар натижасида ёнғин соат 00:30 да ўраб олиниб, 02:45 да бартараф этилган. Ёнғин оқибатида қуритиш, матога ишлов бериш, маҳсулотларни сақлаш омбори ва бўёқлаш цехларининг ҳамда жамият маъмурий биносининг томи ва ички қисмлари тахминан 1500 кв метр майдонда ёниб зарарланган.
Маъмурий бинонинг 3-қаватида ёнғинни ўчиришга жалб этилган Андижон вилояти Ёнғин хавфсизлиги бошқармаси 1-сонли Касбийлаштирилган ёнғин хавфсизлиги қисми навбатчилик сменалари ёнғин ўчириш экипажи бўлинма командири Ж.Н. 2-қаватга тушиб кетиши натижасида тан жароҳати олган. Унга биринчи тиббий ёрдам кўрсатилиб, РШТЁИМ Андижон филиалига олиб борилган ва кўрсатилган тиббий муолажаларга қарамасдан вафот этган.
Ёнғиндан ишлаб чиқариш чецининг тахминан 1200 кв метр майдони сақлаб қолинган. Ёнғин сабаби ва моддий зарар миқдори аниқланмоқда. Ёнғин ҳолати юзасидан Андижон шаҳар прокуратураси томонидан терговга қадар текширув ишлари олиб борилмоқда.
