Ўзбекистон халқи хавфсиз ва ишончли транспорт хизматларига лойиқ, деди президент Шавкат Мирзиёев 24 октябрь куни Тошкент метрополитенининг Юнусобод йўналиши қурилиши жараёни билан танишар экан.
«Нима учун биз лойиҳани қайта тикладик (Шавкат Мириёев 2016 йил сентябрда президент в. б. бўлган вақтда тўхтатиб қўйилган лойиҳани қайта тиклаган эди — таҳр.)? Чирой учун эмас, балки одамларга шароит яратиш учун», — деди давлат раҳбари. Қурилиш майдонига ташриф «Ўзбекистон 24» телеканалининг «Янгиликлар 24» дастурида намойиш этилди.
«Метро фақат метро учун қурилмайди, у ҳаётнинг маъносини ўзгартириши керак, у фойдаланиш учун қулай бўлиши керак. Арзон, қулай ва хавфсиз. Ер ости метроси ур усти метроси билан бирлашган вақтида экологиянинг қандай ўзгаришини тасаввур қилинг», — деди у.
Президент: «Ушбу тажрибани босқичма-босқич вилоятларда ҳам жорий этишимиз керак», — дея қўшимча қилди.
Юнусобод тармоғини узайтириш лойиҳаси қиймати 103,8 млн долларни ташкил этади (51 млн доллар — давлат бюджетидан, 52,8 млн — Тикланиш ва тараққиёт жамғармасидан), қурилиш бошланган вақтдан буён 67,5 млн доллар ўзлаштирилди.
Ҳозирги Шаҳристон станциясидан Юнусобод ва Туркистон станцияларигача 2,9 км йўллар ётқизилди. Туннеллардан бирининг темир-бетон конструкциялари билан бурғулаш ва мустаҳкамлаш ишлари якунланди, иккинчи туннелни бурғилаш ишларини эса 10 ноябрга қадар якунлаш режалаштирилган.
Туннел Германиядан олиб келинган Herrenknecht мажмуаси ёрдамида ёпиқ усулда қурилмоқда. Лойиҳа бўйича 1500 нафар мутахассис ишлайди, 40 дан ортиқ техника ва механизмлар жалб қилинган.
Шавкат Мирзиёев бош вазирнинг биринчи ўринбосари, транспорт вазири Ачилбай Раматов билан.
Бир гуруҳ чет эллик ва ўзбекистонлик мутахассислар лойиҳа менежери, DB Engineering and Consulting (Deutsche Bahn) вакили Якуб Шонс раҳбарлигида ишламоқда.
«Ишонч билан айта оламанки, қурилиш халқаро стандартларга тўла мос келади», деди у телеканалга берган интервьюсида.
«Лойиҳалаштириш босқичида Ўзбекистон томони бизга иккита масала бўйича ёрдам сўраб мурожаат қилди: энг янги туннел қазиш машинасини етказиб бериш ҳамда лойиҳа устидан назоратни, яъни лойиҳанинг халқаро стандартларга мувофиқлигини таъминлаш. Биз нафақат қурилиш сифатини назорат қиламиз, балки ўзбекистонлик мутахассисларни ҳам тайёрлаймиз», — деди мутахассис.
DB Engineering and Consulting мутассиси қуйидагиларни таъкидлади: «Биринчидан, биз конструкциялар, туташув қисмлари, бетон аралашманинг сифати, унинг мустаҳкамлиги ва чидамлилиги, кабел ўтказгичлари ва ёнғинга қарши тизимлари учун жавобгармиз. Ишонч билан айтишимиз мумкинки, ҳаммаси юқори даражада».
Бугунги кунда Тошкент метросидан кунига 240 минг йўловчи фойдаланмоқда. Учта янги участканинг (Юнусобод, Чилонзор линиясини Сергели туманигача узатиш ва Дўстлик станциясидан Қўйлиққача метро очилиши) ишга туширилиши билан бу кўрсаткични 500 мингга етказиш режалаштирилмоқда. Келгусида Чилонзор линиясининг Буюк Ипак Йўли станциясидан ТТЗ автовокзалигача узайтирилиши ҳамда ер усти ҳалқа метроси қурилиши тугалланиши ҳисобга олинса, у 2 миллион йўловчига кўпайиши мумкин.
Шавкат Мирзиёев пойтахт аҳолисининг 30 фоизи метро хизматларидан фойдаланишини таъминлаш вазифасини юклади.
У бугунги кунда йўловчиларга хизмат кўрсатиш даражаси талабларга жавоб бермаслигини таъкидлаб, тажрибали менежерлар ва маркетологларни жалб қилишни тавсия қилди. Йўловчилар оқимини кўпайтириш учун жамоат транспорти йўналишлари ва йўл ҳақини тўлаш тизимини қайта кўриб чиқиш режалаштирилган.
