Ўзбекистонда 2020 йилда олтин ва кумуш қазиб олиш 150 тоннага, 2021 йилда эса 300 тоннага етказилади. Бу ҳақда ер қаърини геологик жиҳатдан ўрганишни янада такомиллаштириш ва 2020−2021 йилларда минерал-хомашё базасини ривожлантириш ва қайта тиклаш давлат дастурини амалга ошириш чора-тадбирлари тўғрисидаги президент қарорида сўз боради, дея хабар берди Адлия вазирлиги матбуот хизмати.
Қарор билан 2020−2021 йилларда минерал-хомашё базасини ривожлантириш ва қайта тиклаш давлат дастури маъқулланди. Дастур доирасида фойдали қазилмаларнинг истиқболли майдонларини қидириш 2020 йилда 35 фоизга, 2021 йилда 40 фоизга етказилади.
Дастурни амалга ошириш учун жами 2 трлн 371 млрд 9 млн сўм маблағ ажратилади.
Қарор билан Геология-қидирув ишларини олиб боришни янада такомиллаштириш, ер қаърини оқилона ўрганиш ва ўзлаштириш, шунингдек, кон-геология соҳасининг инвестициявий жозибадорлигини ошириш бўйича «Йўл харитаси» тасдиқланди.
«Йўл харитаси» доирасида геология-қидирув ишлари ҳисоботларини тузишнинг халқаро стандартлари жорий қилинади ва фойдали қазилмалар захиралари JORC Кодексига мувофиқ тасдиқланади.
Қаттиқ фойдали қазилма майдонлари ва конлари тўғрисидаги маълумотларни жойлаштириш учун ягона электрон онлайн платформа ишга туширилади.
Стратегик муҳим турдаги қаттиқ фойдали қазилмаларни ўзлаштириш учун инвестицияларни жалб қилиш бўйича президент қарори лойиҳаси ишлаб чиқилади. Лойиҳада фойдали қазилмаларни қидириш ва аниқлаш ҳуқуқи учун имтиёзли бонус ставкалари қайта кўриб чиқилади. Шунингдек, инвестиция лойиҳасини амалга оширишнинг бутун даврида солиқ қонунчилигининг ўзгармаслиги кафолатлари таъминланади.
Аввалроқ яқин беш йилда олтин захиралари ўсиши 474 тонна, қиймати 18,75 млрд доллар бўлиши хабар қилинган эди. 2017 йилда эса Ўзбекистон ҳукумати прогноз захиралари 151 тонна олтин ва 1,2 минг тонна кумушни ташкил этувчи 31 та истиқболли майдонча ва 12 та кон рўйхатини эълон қилди.
