Жорий ҳафта Ўзбекистонда «Олимпия куни» кенг нишонланади. Кеча Бухородаги Арк қўрғонида «Олимпия куни"га бағишланган оммавий соғломлаштириш тадбири ўтказилди.Бу ҳада МОҚ матбуот хизмати хабар берди.
Ёшларни жисмоний тарбия ва спортга кенг жалб қилиш, олимпия ҳаракатини ривожлантириш, олимпизмнинг эзгу ғояларини илгари суриш мақсадида ташкил этилаётган ушбу тадбирда ўн минг киши иштирок этди.
Арк қўрғонида йиғилган қатнашчилар олимпизм тимсолини ифодаловчи 5 хил рангдаги футболкаларда олимпиада ҳалқасини шакллантирдилар. Тадбирда, шунингдек, халқаро мусобақаларда ғолиб ва совриндор бўлган бухоролик спортчилар ҳам иштирок этди.
Маълумот учун, бу йилги «Олимпия куни» илк маротаба бутун Ўзбекистон бўйлаб умуммиллий халқ сайли тарзида нишонланади. Бундан кўзланган мақсад — Ўзбекистон аҳолисининг турли қатламини, айниқса, ёшларни мана шундай эзгу ғоя остида бирлаштириш, уларни спортга жалб этишдир. Халқаро «Олимпия куни"нинг асосий тадбирлари 5−6 июль санасига белгиланган бўлса, Тошкентдаги бош тантана 6 июль куни «Ҳумо арена» муз сайройида эстрадамиз юлдузларининг иштирокида катта гала-концерт тарзида ўтказилади.
