7−8 июнь кунлари Наманганда Doing business with Namangan халқаро инвестицион форуми бўлиб ўтди. Форум Ўзбекистон Ташқи ишлар вазирлиги ва Наманган вилояти ҳокимлиги томонидан ташкил этилди, дея хабар қилди ТИВ матбуот хизмати.
Форумда 500 нафардан зиёд иштирокчи, жумладан 350 нафар хорижий меҳмонлар, хусусан 36 давлатдан 230 нафар ишбилармонлик доиралари, Ўзбекистонда аккредитациядан ўтган дипломатик корпус ва чет эл ОАВ вакиллари, шунингдек Ўзбекистоннинг Наманган вилоятига бириктирилган 18 нафар элчиси қатнашди.
Икки кун давом этган форум якунлари бўйича умумий қиймати 320 млн доллар бўлган 39 та битим имзоланди. Жумладан, меҳмонхона ва бизнес марказлари қурилиши бўйича 50 млн долларлик, Поп туманида фойдали қазилмаларни қазиб олиш бўйича 40 млн долларлик, Россияга тўқимачилик маҳсулотларини экспорт қилиш бўйича 30 млн долларлик шартномалар имзоланди.
Форум доирасида илк бор вилоятда экспортчиларни қўллаб-қувватлаш учун Ўзбекистон ишлаб чиқарувчилари каталогини ўз ичига олган MadeinNamangan.uz интернет портали ишга туширилди.
