Ўзбекистон Марказий Осиё давлатлари билан 2019 йилги вегетация даврида Сирдарё ва Амударё ҳавзалари бўйича сув лимитлари тўғрисидаги келишувга эришди. Бу ҳақда Ўзбекистон Сув хўжалиги вазирлиги матбуот хизмати хабар қилди.
19 апрель куни Тошкентда Сув хўжаликларининг давлатлараро мувофиқлаштириш комиссиясининг 76-мажлиси бўлиб ўтди. Унда музокаралар якунлари бўйича сув истеъмоли лимитлари ҳамда сув омборлари каскадлари фаолияти прогноз режимлари тасдиқланди.
Йиғилишда Ўзбекистон сув хўжалиги вазири Шавкат Ҳамроев, Қозоғистон қишлоқ хўжалиги вазири ўринбосари Ерлан Нисанбаев, Тожикистон энергетика ва сув ресурслари вазирининг биринчи ўринбосари Султон Раҳимзода ва Туркманистон сув хўжалиги давлат қўмитасининг сувдан фойдаланиш бошқармаси бошлиғи Байгелди Байжонов иштирок этди.
Мамлакатлар Орол денгизи ҳавзаси давлатларига ёрдам кўрсатиш бўйича ҳаракатлар дастурини ишлаб чиқишда иштирок этиш масаласини ҳам кўриб чиқди.
