Бугун профессионал боксда фаолият олиб бораётган ўзбекистонлик Баҳодир Жалолов ўзининг навбатдаги жангини ўтказади. Бу ҳақда МОҚ матбуот хизмати хабар берди.
Даставвал тарқатилган маълумотларга кўра, Баҳодир америкалик Пальмер Донние билан жанг қилиши керак эди. Аммо Баҳодир Жалолов ва унинг менежерлари келишган ҳолда олтинчи жангда титул камари учун баҳс олиб боришни лозим топишди.
Шу тариқа, Баҳодир бугун вакант турган «NABF Junior Heavyweight Title» камари учун америкалик Брендан Барретга қарши жанг қилади. Маълумот учун, Баррет шу пайтгача 11 марта жанг олиб борган бўлиб, 7 бор ғалаба қозонган, шунингдек, унинг ҳисобида 2 тадан мағлубият ва дуранг ҳам мавжуд.
Баҳодир Жалолов учун бу олтинчи жанг бўлади. Жалолов аввалги барча беллашувларда муддатидан аввал рақибларини ер тишлатган. Бўлажак жангга Нью-Йорк шаҳри мезбонлик қилиб, баҳс Тошкент вақти билан эртага эрталаб бошланади.
Эслатиб ўтамиз, Баҳодир Жалолов 16−27 апрель кунлари Таиландда бўлиб ўтадиган Осиё чемпионатида ҳам Ўзбекистон шрафини ҳимоя қилади.
