Индонезияда давом этаётган Параосиё ўйинларида ўзбекистонлик енгил атлетикачилар учта, сузувчилар бешта медаль соҳиби бўлди. Бу ҳақда МОҚ матбуот хизмати хабар берди.
Енгил атлетикачи Моҳигул Ҳамдамова кумуш медалга эга чиқди. Енгил атлетика бўйича 100 метрга югуриш баҳсларида Мансур Абирашидов 11:26 сониялик натижа билан маррага биринчи бўлиб етиб борди ва олтин медаль соҳибига айланди. Ядро улоқтириш беллашувларида эса Бобиржон Омонов 12,31 метрлик натижа билан биринчи бўлди.
100 метрга брасс усулида сузган Фирдавсбек Мусабеков 01:05:75 натижа билан олтин медални қўлга киритди. Ислам Асланов эса маррага учинчи бўлиб етиб борди ва бронза медали соҳибига айланди.
Худди шу йўналишда аёллар ўртасидаги беллашувларда иштирок этган Фотимахон Амилова эса 01:09.57 натижа билан жаҳон рекордини ўрнатди ва олтин медалга эга чиқди. Ушбу йўналишда кумуш ва бронза медаллари ҳам ўзбекистонлик спортчиларга насиб этди. Фотимахондан кейин маррага Шоҳсанамхон Тошпўлатова етиб келиб, кумуш медаль эгасига айланган бўлса, Нигорахон Мирзоҳидова бронза медалини терма жамоамиз ҳисобига қўшиб қўйди.
