Осиё ўйинларида қатнашган Ўзбекистон ОТЖ Жанубий Кореяга ютқазиб, турнирни тарк этди. Шундан сўнг футболчиларнинг МОҚ президенти Умид Аҳмаджоновга видеомурожаати ижтимоий тармоқларда тарқалди. Championat.asia сайти мухбири билан суҳбатда Умид Аҳмаджонов йигитлардан ортиқча тушунтириш талаб қилинмаганини айтди.
— Футболчиларга нима бўлди? Чемпион бўлади, деб кутгандик…
— Биз ҳам бунга катта умид боғлагандик. Ўйинни кўрган бўлсангиз керак, насиб қилмади. Ҳамма бирдек ҳаракат қилди. Энди спортнинг бошқа турларида олтин медаллар йўлида кураш олиб боряпмиз.
— Билишимизча, футболчиларнинг натижаси раҳбариятга ёқмаган экан…
— Буни ким айтди? Агар футболчилар умуман ҳаракат қилмай, рақибни шунчаки ўтказиб юборганларида фикрингизга қисман қўшилишим мумкин эди. Ахир улар майдонда жонларини бериб ўйнашди. Бизга энг кераги ҳам аслида шу.
— Бундай деяётганимнинг сабаби — кеча ҳамма жойда тарқалиб кетган Равшан Ҳайдаров ҳамда футболчиларнинг сизга мурожаати…
— Тўғрисини айтсам, видеони эрталаб сизнинг сайтингизда кўрдим. Жамоа аъзолари чин кўнгилдан нимадир қилмоқчи бўлишган экан. Аммо бундай нарсани ҳамма жойга тарқатиш биринчи хато. Қолаверса, нима бўлганини ҳаммамиз кўрдик, демак, жамоанинг ортиқча тушунтириш беришига ҳожат йўқ. Биз улардан буни талаб қилмаймиз.
— Рости мен ҳам шунга ҳайрон бўлгандим.
— Бу ишни ким қилганини тагига етдик. Ёмон ниятда қилмаган, шунчаки, ёшлик қилган. Мағлубият бизники, кейинги сафар хатолар устида биз ишлашимиз керак. Ғалаба эса мухлисларники, биз халқимизни хурсанд қилиш йўлида меҳнат қиламиз. Спортчилар билан учрашганда ҳам доим шуни таъкидлайман. Чунки ўзимга ҳам президент асосий мақсадим одамлар кўзида қувонч ва бахт кўриш, деб айтган. Спортчилар шу йўлда ҳаракат қилишлари, спорт эса соғлом турмуш тарзини тарғиб қилиши керак.
— Демак, жамоага ҳеч қандай эътироз йўқ?
— Қандай эътироз бўлиши мумкин?! Бу аслида норасмий мусобақа. Биз шунчаки футболчиларни, мухлисларни уйғотиб олиш учун ҳам ҳар қандай ўйинда, мусобақада ғолиб бўлиш учун ўйнаяпмиз. Футболчига нима фарқи бор у қандай ўйин эканини, терма номидан майдонга тушяптими, борини бериши шарт. Кореяга қарши ўйинда йигитлар буни сидқидилдан бажаришди. Асосий мақсадимиз эса Токио-2020 ва Қатар-2022. Шунинг учун ҳам хориждан машҳур мутахассисларни таклиф қилдик.
