Тошкент ИИББ ходимлари банкдан 270 минг доллар пулни ўмарганликда гумон қилинаётган шахсни қўлга олди, дея хабар қилди бошқарма матбуот хизмати.
25 июнь куни кундузи ИИББга Ўзбекистон Миллий банки филиали раҳбариятидан 270 минг доллар пулнинг ўғирлангани тўғрисидаги хабар келиб тушди. Ҳодиса жойига зудлик билан тезкор қидирув гуруҳи етиб борди. Мазкур ҳолат юзасидан жиноий иш қўзғатилди.
Ўғирликка алоқадор шахсни аниқлаш ва ўғирланган валюта бойликларини топишга қаратилган тергов-қидирув тадбирлари давомида омборхонага киришга рухсати бор касса мудири шубҳа остига олинди. У душанба куни иш жойида бўлмаган ва филиал раҳбариятининг қўнғироқларига жавоб бермаган.
Тезкор қидирув тадбирлари давомида 1985 йилда туғилган гумондор шу куни кечқурун ўғирланган пуллар эвазига сотиб олинган квартирасида қўлга олинди. У пул ўғирлаганини тан олди ва пулларни ўтган ҳафта ўғирлаганини маълум қилди. У иш куни тугаши ва банкнинг бошқа ходимлари бинони тарк этишини кутиб, пуллар сақланувчи омборхонага кириш имконияти борлигидан фойдаланган ҳолда 270 минг долларни ўмарди.
У ўз ҳаракатларини танишлари, қариндошларидан олган қарзларини қайтариш, аввалроқ кредитга олинган автомобиль тўловларини қоплаш мақсадида амалга оширгани билан изоҳлади. Унинг сўзларига кўра, қарзлари жами 100 минг долларни ташкил этган.
Қўлга олинган шахс пулнинг катта қисмини икки дам олиш куни ва душанбанинг биринчи ярмида сарфлашга, жумладан ўзига квартира, маиший ва компьютер техникалари, озиқ-овқат ва бошқа истеъмол товарларини сотиб олиб, қарзларининг маълум қисмини тўлашга улгурганини маълум қилди. Тергов давом этмоқда.
Қўлга олинган шахс ҳамкасбларининг маълум қилишича, у — оилавий киши, икки боланинг отаси — аввал ёмон хулқи билан кўзга ташланмаган.
