Тошкент метрополитенининг Ўзбекистон йўналишидаги «Беруний» метро станциясида аёл киши ўз жонига қасд қилишга уринди, дея хабар берди пойтахт метрополитенидан «Газета.uz"га.

Ҳодиса 19 март куни 18:58 да поезд охирги бекатга туннелдан чиқиб келаётганда содир бўлди.

«У рельслар ўртасига йиқилиб тушди, ҳеч қандай жароҳат олмади. Ҳозир у эски ТошМИ да (Тошкент тиббиёт академияси — таҳр.)», — деди метро навбатчилик қисми ходими.

Ички ишлар органлари ходимлари аёлнинг шахсини аниқлагани йўқ. «У халатда ва шиппакларда эди. Биз билан суҳбатлашишдан бош тортди. Ҳозирча унинг шахсини аниқлаганимизча йўқ», — деди метрополитен хизматчиси.

Навбатчилик қисмидан маълум қилинишича, бу 2018 йилда метрополитендаги иккинчи ўз жонига қасд қилишга уринишдир. Февраль ойи бошида аёл киши оилавий муаммолар сабабли суиқасд қилишга ҳаракат қилган эди. «Одатда бир йилда икки-уч марта бундай ҳолатлар бўлиб туради», — деди метрополитен вакили.