Озиқ-овқат маҳсулотлари логистикаси соҳасида фаолият кўрсатувчи Хитойнинг энг йирик компанияларидан бири Ўзбекистонда қишлоқ хўжалиги лойиҳаларига 500 млн доллар миқдорида инвестиция киритади, дея хабар қилди «Ўзбекозиқовқатхолдинг».
5−12 декабрь кунлари Хитой озиқ-овқат бозорининг 37 фоиз улушига эгалик қилиб, 50 дан зиёд давлат билан ҳамкорликни йўлга қўйган Wanbang компанияси (Хенан провинцияси) раҳбарияти Тошкент, Сирдарё ва Жиззах вилоятларига ташриф буюрди.
Ташриф якунлари бўйича Henan Wanbang Selected Supply Chain Menejment, Ўзбекистон Қишлоқ ва сув хўжалиги вазирлиги ва «Ўзбекозиқовқатхолдинг» ўртасида қишлоқ хўжалиги, жумладан чорвачилик маҳсулотларини ишлаб чиқариш, қайта ишлаш ва қадоқлаш, шунингдек тайёр товарларни экспорт, импорт ва реэкспорт қилиш соҳаларида 15 дан зиёд лойиҳа имзоланди. Мазкур лойиҳаларни амалга оширишга 500 млн доллар миқдорида инвестиция киритилади.
Келишув доирасида Ўзбекистон эркин иқтисодий зоналарда 10 минг гектар майдонда қишлоқ хўжалиги маҳсулотларини қайта ишлаш объектлари ва логистика марказларини қуриш кўзда тутилган. Бундан ташқари, Хитойга 100 минг тонна ўзбек мошини етказиб бериш режалаштирилган.
