Ўзбекистон Жаҳон банки Гуруҳининг тадбиркорлик муҳитини яхшилаш бўйича «Бизнесни юритиш-2018» (Doing Business 2018) рейтингида учинчи бор дунёнинг етакчи ўнта давлати қаторидан ўрин олди.
Жорий йилги мавзуси «Иш ўринларини яратиш учун ислоҳотлар қилиш» бўлган янги ҳисоботда Ўзбекистон ўтган йилги 87-ўриндан 13 поғона юқорилаб, 74-ўринни банд этди.
Рейтинг тузувчилари мамлакат рейтингини яхшилашга хизмат қилувчи бизнес соҳасидаги бешта ислоҳотни қайд этишади. Улар бизнесни рўйхатга олиш, қурилиш учун рухсатнома олиш, миноритар инвесторларни ҳимоя қилиш, солиққа тортиш ва электр таъминоти тизимига уланиш соҳаларидаги ўзгаришларни баҳолайди.
ЖБнинг Марказий Осиё бўйича минтақавий директори Лилия Бурунчук чоршанба куни Тошкентдаги тақдимот ҳисоботида ҳукуматнинг мамлакатда ислоҳотларни амалга ошириш мақсадидаги ишончли чораларини таъкидлаб ўтди. У тадбиркорлар ҳамон қийинчиликларга дуч келаётган вилоятларда ислоҳотларни давом эттириши лозимлигини қайд этди.
Ҳисоботда келтирилишича, Ўзбекистонда тадбиркорлик фаолиятини рўйхатга олиш учун янги платформа ишга туширилиши шарофати билан бизнесни бошлаш осонлашди, бунда жараёнлар 4 тадан 3 тага камайтирилди. Мазкур кўрсаткич бўйича Ўзбекистон глобал рейтингда 11-ўринни эгаллайди.
15 йил муқаддам янги бизнесни рўйхатга олиш 10 та жараён, 28 кун ва аҳоли жон бошига даромаднинг 14 фоизини (у 2220 АҚШ долларига баҳоланади) талаб қилган бўлса, айни пайтда бу кўрсаткич 3 та жараён, 5 кун ва аҳоли жон бошига даромаднинг 3 фоизини ташкил этмоқда.
Айни пайтда Ўзбекистон рейтингда халқаро савдо индикатори ва қурилишга рухсат олиш мезонларида ортда қолмоқда. Жорий йилдаги рухсат олишни енгиллаштиришга йўналтирилган ислоҳотларга қарамасдан, бу жараён ҳамон 17 та турли жараён ва 246 кунни талаб қилмоқда.
Глобал рейтингда Янги Зеландия биринчи ўринни эгаллаган, кейинги поғоналарда эса Сингапур, Дания, Корея Республикаси, Гонгконг (Хитой), АҚШ, Буюк Британия, Норвегия, Грузия ва Швеция бормоқда.
