Ўзбекистон Олий Мажлиси Қонунчилик палатаси депутатлари паспорт тизими қоидаларини бузганлик учун жарималар миқдорини камайтириш ва унинг энг кам миқдорини белгилаш мақсадида қонунчиликка ўзгартиш киритиш ташаббуси билан чиқишди. Бу ҳақдаги қонун лойиҳаси парламент қуйи палатасининг 28 апрелдаги йиғилишида кўриб чиқилди, деб хабар берди палата сайти.
Маъмурий жавобгарлик тўғрисидаги кодекснинг 223-моддасида паспорт тизими қоидаларини бузганлик учун жарима белгиланган. Унга кўра, паспорти бўлиши шарт бўлган фуқаронинг паспортсиз ёки ҳақиқий бўлмаган паспорт билан, вақтинча ёки доимий пропискасиз ёхуд турган жойи бўйича ҳисобда турмасдан яшаши, паспортни қасддан яроқсизлантириши, шунингдек паспортни бепарволик билан сақлаши ва бунинг оқибатида паспортнинг йўқолиши энг кам иш ҳақининг уч баравари миқдорида жарима солишга сабаб бўлади.
«Жариманинг 450 минг сўм, яъни анча юқори миқдори фуқароларнинг, айниқса кам таъминланган оилалар аъзолари бўлган фуқароларнинг паспорт олмаслигига ёки уларни амал қилиш муддати ўтганидан кейин алмаштирмасликни афзал кўришларига олиб келган», — дейилади Қонунчилик палатаси матбуот хизмати хабарида.
Депутатлар ушбу масалани жорий йил бошидан ҳар ойда ҳудудларда ўтказилган сафарлари давомида батафсил таҳлил қилди.
