Бухоро вилоятининг Қоровулбозор туманидаги Аму — Бухоро машина канали устида барпо этилган янги кўприк фойдаланишга топширилди, деб хабар қилди ЎзА.
Кўприк халқаро аҳамиятга эга «Ғузор-Бухоро-Нукус-Бейнов» А-380 йўлида жойлашган. Лойиҳа доирасида 11,8 млрд сўмлик қурилиш-монтаж ишлари бажарилди.
Аввал хабар қилганимиздек, кўприкни лойиҳалаштириш 2016 йил июлида бошланган эди. Ўшанда 1961 йилда қурилган эски кўприкнинг бир қисми қулаб тушган эди.
Тўрт полосали йўлдаги янги кўприкнинг эни 27, узунлиги 72 метрни ташкил этади. Иншоотнинг икки томонида пиёдалар учун йўлаклар барпо этилган.
«Бухороавтойўл» ҳудудий йўллардан фойдаланиш ташкилоти директори ўринбосари Шерзод Эгамовнинг таъкидлашича, яқин вақтларда янги кўприкнинг икки томонидаги автотрассанинг 5 километрлик қисми қайта қурилади.
