Халқаро аҳамиятдаги А-380 «Ғузор-Бухоро-Нукус-Бейнеу» автомобиль йўлининг 184-километрида, «Аму-Бухоро» канали устида қисқа муддатларда янги ва замонавий кўприк бунёд этилмоқда, деб хабар қилди «Ўзавтойўл» компанияси ахборот хизмати.
Янги кўприкнинг лойиҳавий жараёнлари 2016 йилнинг июль ойидаёқ бошланган (ўшанда 1961 йилда қурилган эски кўприкнинг бир қисми қулаб тушган эди). Қурилиш ишлари Қашқадарё кўприк хўжалигини сақлашга ихтисослашган таъмирлаш-фойдаланиш корхонасига топширилган.
Умумий узунлиги 72,5 метр бўлган янги кўприк икки томонлама қатнов қисмига эга бўлиб, ҳар бир қисмининг эни 10 метрдан ортиқ. Бундан ташқари, ҳар иккала томонда ҳам эни қарийб бир ярим метрдан иборат 2 та пиёдалар ўтиш йўлаги қурилмоқда.
Янги кўприкнинг умумий лойиҳавий қиймати 11,8 млрд сўмдан ортиқ бўлиб, Наврўз байрами арафасида фойдаланишга топширилиши мўлжалланмоқда.
Лойиҳачи ва қурувчилар кўприкнинг замонавий ҳамда ҳар томонлама чидамли бўлишига аҳамият берганлари ҳолда, унинг таянч қирғоқларига 72 дона бетон қозиқлар, ўрта таянч қисмларига эса ҳар бирининг узунлиги 14 метрдан иборат 104 дона металл қувурлар ўрнатишмоқда.
«Бундан ташқари, қурилаётган кўприкни мавжуд асосий йўлга боғлаш мақсадида Бухоро томонидан 247 метр, Қарши томонидан эса 178 метр узунликдаги янги асфальтбетон йўл ҳам қурилмоқда. Қурилиш ишлари учун 40 нафарга яқин ишчи-хизматчилар, ҳайдовчи ва механизаторлар куну тун меҳнат қилишмоқда», — дейди қурилиш корхонаси раҳбари Камолиддин Маҳкамов.
.
