Beeline брендига эгалик қилувчи VimpelCom холдинг компанияси ўз номини VEON қилиб ўзгартиришни мўлжалламоқда. Мазкур қарор акционерларнинг 30 мартда бўлиб ўтадиган навбатдан ташқари йиғилишида тасдиқланиши кутилмоқда.
Ребрендинг «телекоммуникацион компаниядан глобал технологик етакчига айланиш мақсад қилиб олинганини акс эттиради», дейилади холдинг хабарида. Номнинг ўзгариши Ўзбекистонда Beeline бренди остида мобиль алоқа хизматларини кўрсатаётган Unitel фаолиятига тааллуқли эмас.
«Гуруҳларнинг бизнес-моделлари тўлиқ ўзгартирилади, асосий урғу VEON интернет-платформаларини ривожлантиришга қаратилади», — деди Beeline тижорий директори Максим Ефремов пайшанба куни Тошкентда бўлиб ўтган матбуот анжуманида.
Unitel техник директори Евгений Ключевнинг таъкидлашича, 2017 йилда оператор Ўзбекистоннинг йирик шаҳарлари, жумладан барча вилоятлар марказларида 4G-интернетни кенгайтиради. Унинг айтишича, алоқа сифати пойтахтдагидан кам бўлмайди.
