25−26 ноябрь кунлари Мехикода (Мексика) спорт гимнастикаси бўйича Abierto Mexicano de Gimnasia халқаро очиқ турнири бўлиб ўтди. Мусобақада дунёнинг 10 мамлакати — Бразилия, Германия, Испания, Италия, Колумбия, Мексика, Руминия, Ўзбекистон, Украина ва Япониядан спортчилар иштирок этди, дея хабар қилди Миллий олимпия қўмитаси.
Ўзбекистон шарафи учун қатнашган Оксана Чусовитина таяниб сакрашда 14,25 балл билан энг яхши натижани қайд этди, иккинчи ўринни украиналик гимнастикачи Ангелина Кисла (13,975), учинчи поғонани эса мексикалик Мириана Алмеида (13.925) банд этди.
Тўрт турдаги машқларни бажариш бўйича кўпкурашда Чусовитина турнирнинг бронза медалига сазовор бўлди (52,225). Кумуш медал бразилиялик Каролин Педрога насиб этган бўлса (53,975), украиналик Ангелина Кисла олтин медалга лойиқ деб топилди (54,400).
Оксана Чусовитина — гимнастика тарихидаги ягона — ёзги Олимпиадада етти маротаба чиқиш қилган (1992, 1996, 2000, 2004, 2008, 2012 ва 2016 да) гимнастикачи, тўрт карра жаҳон чемпиони бўлган, жаҳон биринчиликларида тўртта кумуш ва тўртта бронза медалини қўлга киритган.
