Ўзбекистон Марказий сайлов комиссияси 17 сентябрь куни Европада хавфсизлик ва ҳамкорлик ташкилоти Демократик институтлар ва инсон ҳуқуқлари бўйича бюроси (ЕХҲТ ДИИҲБ)га 4 декабрда бўлиб ўтадиган Ўзбекистон Президенти сайловининг халқаро кузатувида иштирок этиш учун расмий таклифнома юборди. Бу ҳақда «Газета.uz"га МСКдан хабар қилинди.
Ўзбекистон сайлов қонунчилиги сиёсий партиялардан кузатувчилар билан бирга хорижий давлатлар, халқаро ташкилотлар ва ҳаракатлар вакилларининг сайловни кузатишда иштирок этиши имконини назарда тутади. Уларга сайловга тайёргарлик кўриш ва уни ўтказиш бўйича барча тадбирларда, шунингдек сайлов куни овоз бериш хоналарида ва овозларни санаб чиқишда кузатувни амалга ошириш ҳуқуқи берилган.
Эслатиб ўтамиз, ЕХҲТ ДИИҲБ кузатувчилар миссияси Ўзбекистондаги парламент ва президентлик сайловларида бир неча марта иштирок этган. Жумладан, 2014 йилдаги парламент ва 2015 йилдаги президентлик сайловларида кузатувчилик қилган.
