AQSh prezidenti Jo Bayden ma’muriyati Rossiya prezidenti Vladimir Putin Ukrainadagi urush trayektoriyasini o‘zgartirish uchun “yetarlicha kuchga ega bo‘layotganidan” tobora xavotirlanmoqda, deb yozadi New York Times (NYT).
So‘nggi kunlarda Rossiya armiyasi Xarkov viloyatida yangi hujumni boshladi, bu esa Ukrainani 2022-yil kuzidagi muvaffaqiyatli qarshi hujum natijasida ishg‘oldan ozod qilingan hududni himoya qilish uchun shusiz ham siyraklashgan qo‘shinlarini qayta joylashtirishga majbur qildi, deb yozdi nashr.
Rossiyaning harbiy kuchayishiga ko‘plab omillar yordam bermoqda, ta’kidladi NYT. Xususan, rus qo‘shinlari jang maydonida “kechikadigan, ammo hayratlanarli darajada samarali bo‘lgan” radioelektron jang imkoniyatlarini yaxshilagan. Ular GPS qabul qiluvchilarini aldab, Ukraina dronlari va HIMARS`dan uchirilgan raketalarni chalkashtirib yuboradi. Rossiyaliklar, shuningdek, ushbu raketalarning harakatlarini kuzatish va ba’zan ularni, hatto ehtiyotkorlik bilan yashirilgan bo‘lsa ham, yo‘q qilishga o‘rganib olgan.
AQSh Kongressida Ukrainaga harbiy yordam paketini jo‘natish bo‘yicha bir necha oy davom etgan munozaralar “Rossiya aniq foydalangan imkoniyatni yaratdi”, deb ta’kidlaydi NYT. Moliyalashtirishdagi kechikishlar tufayli rus qo‘shinlari Ukraina ustidan artilleriya bo‘yicha “katta” ustunlikka erishdi va Kiyevning havo mudofaasi taqchilligi Moskvaga o‘z aviatsiyasidan ko‘proq “jazosiz” foydalanishga va Ukraina pozitsiyalariga glide bombalar bilan hujum qilishga imkon berdi.
Ukrainaning armiyaga ko‘proq askar jalb qilish uchun mobilizatsiya to‘g‘risidagi qonunni qabul qilishi ham Amerika qurollarini yetkazib berishning kechikishi bilan bir xil darajada kechikish bilan birga keldi, deb yozdi nashr. Kiyev jiddiy tarzda askarlar yetishmovchiligini boshdan kechirmoqda va “armiyaga yollanganlarni tegishli tayyorgarlikdan o‘tkazish uchun kurashmoqda”.
NYT bilan suhbatda AQSh rasmiylari Ukraina Rossiya qo‘shinlarining hozirgi aksariyat yutuqlarini iyul oyi atrofida ko‘plab G‘arb harbiy yordami kela boshlagach, frontga ko‘proq qo‘shinlar yuborilsa, qaytarishi mumkinligiga ishonch bildirdi. Shu bilan birga, ular hatto bir necha oy ichida janglar qanday rivojlanishi, Ukraina armiyasi 2025-yilda qarshi hujumga o‘ta olishi yoki yo‘qligi haqida prognoz qilishda ikkilanib turibdi.
Baydenning ayrim yordamchilari ham Putin “urushdan asosiy saboqlar”ni olganidan xavotirda. Ularning eng katta tashvishi shuki, Rossiya urushning dastlabki ikki yilida yo‘q qilingan qurollarni almashtira boshlagan va o‘z pozitsiyasini tiklamoqda. Nashrning ta’kidlashicha, Bayden iyun oyida Italiyada bo‘lib o‘tadigan G7 sammitida ham “Putin allaqachon bu urushda mag‘lub bo‘ldi” deb avvalgidek ishonch bilan ayta oladimi yoki yo‘q, aniq emas.
Harbiy tahlilchilarning fikricha, Rossiyaning afzalliklari “abadiy davom etmaydi” va rus armiyasi bu yil yozda yirik hujumga urinishi mumkin. “2024-yilda Rossiya harbiylari moddiy ustunlikka va strategik tashabbusga ega bo‘ladi, lekin bu hal qiluvchi faktor bo‘lmasligi mumkin. Bu yil Rossiya uchun imkoniyatlar oynasi bo‘ladi. Ammo agar rus armiyasi bu afzalliklarni jangovar yutuqlarga aylantira olmasa va jadallikka erisha olmasa, 2025-yilga kirganimizdan so‘ng, oyna yopila boshlashi uchun yaxshi imkoniyat bor”, — dedi Karnegi jamg‘armasining (AQSh) Rossiya bo‘yicha eksperti Maykl Kofman.
AQSh prezidenti ma’muriyati kelgusi bir necha oylar hal qiluvchi bo‘lib, o‘t ochishni to‘xtatish bo‘yicha muzokaralarga olib kelishini kutmoqda — “1953-yilda Koreyadagi faol harbiy harakatlarni tugatganga o‘xshash sulh yoki shunchaki muzlatilgan mojaro”, deb yozdi NYT.
