Aprel oyida O‘zbekistonda ikkilamchi uy-joy narxi 0,7 foizga pasaydi, yillik ko‘rsatkichlarda esa 11,6 foizga oshdi. Toshkentda ikkilamchi uy-joy narxlarining o‘sishi tezlashdi va aprel oyida 1,1 foizni tashkil etdi (martda atigi 0,2 foiz bo‘lgan), deyiladi Iqtisodiy tadqiqotlar va islohotlar instituti sharhida.
Umuman olganda, yil davomida Toshkent shahrida ikkilamchi uy-joylarning o‘rtacha narxi qariyb 13 foizga oshdi. Aprelda narx o‘sishining eng yuqori sur’atlari Bektemir (3,8 foiz), Yakkasaroy (3,6 foiz) va Chilonzor (3,1 foiz) tumanlarida qayd etildi.
Iqtisodiy tadqiqotlar va islohotlar markazi
O‘zbekiston uy-joy bozoridagi faollik aprel oyida o‘sdi. Oy davomida tuzilgan bitimlar soni 11,2 foizga oshib, savdolar 20 mingta bitimni tashkil etdi. Shunga qaramay, aprel oyidagi natija 2023-yilgi darajadan past bo‘ldi, yil davomida sotuvlar hajmi 2 foizga kamaydi.
Hududlar bo‘yicha ko‘chmas mulk bozoridagi faollikning eng katta o‘sishi Navoiy (24 foiz) va Sirdaryo (22,3 foiz) viloyatlarida, shuningdek, Qoraqalpog‘iston Respublikasida (23,5 foiz) qayd etildi. Poytaxtning uy-joy bozorida bitimlar soni oy davomida 6,5 foizga oshdi.
Toshkentda uy-joy ijara bozori
Aprel oyida poytaxtning ijara bozorida yana pasayish dinamikasi qayd etildi. Xarid qilish faolligi 4,6 foizga kamaydi va 1 kvadrat metr uy-joy ijarasi narxi 8,3 dollarni tashkil etdi. Mirobod, Shayxontohur va Yakkasaroy tumanlarida ijara haqi hali ham yuqori bo‘lib qolmoqda, bu yerda har kvadrat metr uchun o‘rtacha ijara haqi 10,4 dollarni tashkil etadi.
Olmazor, Sergeli va Bektemir tumanlarida nisbatan arzon ijara uy-joylari saqlanib qolmoqda, bu hududlarda o‘rtacha ijara narxi har kvadrat metr uchun 6,3 dollarga to‘g‘ri keladi.
Shu bilan birga, 2023-yilning aprel oyiga nisbatan Toshkent shahrida ijara bozori 6,9 foizga qisqardi. Narxlar eng ko‘p pasaygan hududlar Yashnobod (11,6 foiz), Yakkasaroy (11,1 foiz) va Shayxontohur (10,5 foiz) bo‘ldi.
