Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO)O‘zbekistonda chigirtkaga qarshi kurashishni yanada yaxshilash uchun Qishloq xo‘jaligi vazirligi huzuridagi O‘simliklar karantini va himoyasi agentligiga 8 ta maxsus jihozlangan Toyota Hilux avtomobilini topshirdi. Bu haqda Qishloq xo‘jaligi vazirligi matbuot xizmati xabar qildi.
Shu munosabat bilan bo‘lib o‘tgan tadbirda ta’kidlanishicha, Markaziy Osiyo qishloq xo‘jaligi uchun chigirtkalar jiddiy xavf tug‘dirayotganini ko‘pchilik bilmaydi. Ekinlarni yo‘q qilish orqali zararkunandalar hosil miqdori va sifatini pasaytirishi, aholini oziq-ovqat bilan ta’minlashni xavf ostida qoldirishi aniq.
Bundan tashqari, chigirtkalar bosqini qishloq xo‘jaligiga bevosita bog‘liq bo‘lgan fermerlarning daromadlariga salbiy ta’sir ko‘rsatadi. Shu bois ushbu zararkunandalarga qarshi kurashish O‘simliklar karantini va himoyasi agentligining muhim vazifalaridan biri hisoblanadi.
Qayd etilishicha, mazkur ko‘mak FAOning “Markaziy Osiyoda chigirtkalarga qarshi kurashishni takomillashtirish (II bosqich)” mintaqaviy loyihasi doirasida amalga oshirildi.
