O‘zbekistonda xorijdan olib kelinadigan avtomobillarni faqat ularning rasmiy dilerlari sota olishi bo‘yicha talab bekor qilindi. Bu haqda Adliya vazirligining “Huquqiy axborot” kanali xabar berdi.
Unga ko‘ra, 14-avgust kuni hukumat tomonidan “Tadbirkorlik faoliyatini davlat tomonidan tartibga solish tizimi soddalashtirilgani munosabati bilan O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarori qabul qilingan.
Qarorga ko‘ra: yangi import avtomobillar faqat yuridik shaxslar — ishlab chiqaruvchi korxonalarning rasmiy dilerlari tomonidan sotilishi bekor qilinadi.
Elektr energiyasini elektr ta’minoti shartnomasida belgilangan hajmlardan (oylik shartnomaviy miqdordan) ortiqcha iste’mol qilgan yuridik shaxslarga elektr energiyasi yetkazib berishni to‘xtatib qo‘yish amaliyoti tugatiladi.
Tadbirkorning ustav fondini (ustav kapitalini) kamaytirish to‘g‘risida qaror qabul qilinganda, kreditorlarni yozma ravishda xabardor qilish va ommaviy axborot vositalarida bu haqda e’lon berish talabi bekor qilinadi.
Soliq to‘lovchilarga soliq organlarining sayyor soliq tekshiruvlari va soliq auditi natijalari bo‘yicha qabul qilgan qarorlari ustidan to‘g‘ridan-to‘g‘ri sudga shikoyat qilish huquqi beriladi.
Eslatib o‘tamiz, 2022-yil 26-avgustida O‘zbekiston hukumati xorijdan import qilinadigan avtomobillarni sertifikatsiyalashtirish jarayonini osonlashtirish yuzasidan ish olib borayotgani bo‘yicha xabar berilgandi. Ushbu masala 17-avgust kuni tadbirkorlar bilan ochiq muloqot haftaligida muhokama qilingandi.
