2022-yil 1−2-iyul kunlari Qoraqalpog‘iston Respublikasida sodir bo‘lgan voqealarni bartaraf etishda noqonuniy xatti-harakatlarni sodir etgan Ichki ishlar vazirligi tizimida ishlagan xodimlar jinoiy javobgarlikka tortildi. Bu haqda Oliy sud matbuot kotibi Aziz Abidov xabar berdi.
Jinoyat ishlari bo‘yicha Kogon shahar sudining 2023-yil 4-avgustdagi hukmi bilan 1996-yilda tug‘ilgan T. A. va 1985-yilda tug‘ilgan X. S. Jinoyat kodeksining 235-moddasi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) 3-qismida nazarda tutilgan jinoyatni sodir qilganlikda aybli deb topildi. Ularning har biriga 2 yil muddatga ichki ishlar organlarida ishlash huquqidan mahrum qilgan holda 7 yil muddatga ozodlikdan mahrum qilish jazosi tayinlandi.
Shuningdek, 1979-yilda tug‘ilgan J. M. Jinoyat kodeksining 117-moddasi 2-qismi (xavf ostida qoldirish odam o‘limiga sabab bo‘lsa) va 238-moddasi (yolg‘on guvohlik berish) 1-qismida nazarda tutilgan jinoyatlarni sodir qilganlikda aybli deb topildi. Unga 1 yil muddatga ichki ishlar organlarida ishlash huquqidan mahrum qilgan holda 3 yil ozodlikdan mahrum qilish jazosi tayinlandi.
Birinchi instansiya sudining ushbu hukmidan norozi tomonlar qonunchilikda belgilangan tartibda Buxoro viloyat sudiga apellyatsiya tartibida shikoyat berish va protest keltirishga haqliligi ma’lum qilinadi.
