Xorazmda bank binosiga pnevmatik to‘pponcha bilan kirishga uringan fuqaro qo‘lga olindi, deya xabar qilmoqda Milliy gvardiya matbuot xizmati.
Qayd etilishicha, 11-iyul kuni soat 11:07 da Urganch shahar “Qo‘riqlash” bo‘limiga Navoiy ko‘chasida joylashgan “Xalq bank” filialidan “tashvish” signali kelib tushgan. Olingan xabarga ko‘ra voqea joyiga zudlik bilan yetib borgan tezkor harakatlanuvchi guruh tomonidan pnevmatik to‘pponcha bilan bank binosiga kirishga harakat qilgan fuqaro qo‘lga olingan.
Ma’lum bo‘lishicha bank filialida xizmat vazifasini olib borayotgan “Qo‘riqlash” bo‘limi xodimi ushbu fuqaroni binoga kiraverishda ko‘zdan kechirish jarayonida payqab, to‘xtatib qolgan va tashvish tugmasi orqali xabar bergan. Yetib kelgan tezkor guruh xodimlari tomonidan qo‘lga olingan ushbu fuqaro Urganch shahrida yashovchi X.A ekani ma’lum bo‘lgan.
Holat yuzasidan Xorazm viloyati “Qo‘riqlash” boshqarmasi mas’ul xodimlari tomonidan tergovga qadar tekshiruv ishlari boshlangan.
