Shuhrat Abdurahmonov Andijon viloyati hokimi lavozimidan ozod etilgani haqida bir qator internet nashrlari, jumladan, “Daryo” nashri va Vazirlar Mahkamasi huzuridagi “Yangi O‘zbekiston” gazetasi sayti (Kun.uz`ga tayanib) xabar tarqatdi.
Nashrlarga ko‘ra, Andijon viloyat hokimi vazifasini bajaruvchi etib viloyat hokimining birinchi o‘rinbosari, iqtisodiy taraqqiyot va kambag‘allikni qisqartirish boshqarmasi boshlig‘i Dilshod Karimov tayinlangan.
Bir kun avval ijtimoiy tarmoqlarda Shuhrat Abdurahmonovga tegishli deya taxmin qilinayotgan intim video tarqalgandi. Videoyozuvning bir qismi xiralashgan, hokim yuzi eng oxirida ko‘ringan.
“Gazeta.uz” prezident va Andijon viloyati hokimligi matbuot xizmatlariga so‘rov yo‘lladi, biroq hozircha javob ololmadi.
Raddiya
Telegram`dagi AntiFake.uz kanali (tavsifida aytilishicha, soxta axborotlarga raddiyalar uchun rasmiy manba) juma kuni ertalab Shuhratbek Abdurahmonov lavozimidan ozod qilingani hamda viloyat hokimi vazifasini bajaruvchi etib Dilshodbek Karimov tayinlangani haqida xabarlar “rasmiy manbalar tomonidan e’lon qilinmagan”ini bildirdi.
“Axborot resurslaridan haqqoniyligi tasdiqlanmagan, asossiz ma’lumotlarni tarqatmaslikni so‘rab qolamiz”, — deya yozadi kanal yolg‘on axborot tarqatganlik uchun javobgarlik borligini eslatib.
Shundan so‘ng hokimning ishdan bo‘shatilishi haqida xabar tarqatgan OAVlar o‘z xabarlariga raddiyalar e’lon qila boshladi.
Hokim himoyasi uchun postlar
Ijtimoiy tarmoqlarda hokimning iste’foga chiqishi mumkinligi haqidagi xabarlar paydo bo‘lishi bilan birga, uni himoya qiluvchi postlar paydo bo‘ldi va videoni e’lon qilganlarni tanqid qildi.
Xususan, Facebook`dagi “Ta’lim yangiliklari” guruhi administratori Mumtoza Karimova videoning tarqalishini “pastkashlik” va “odamiylik emas” deb atadi.
“Montajligi aniq. Teppaligi aniq. Andijonda bu insonni hurmati va cheksiz mehnati bor. Biling, shunday ulug‘ kunlarda oilangiz, yaqinlaringiz va Andijon xalqi oldida yuzingiz yorug‘… Yozishdi, taqatishdi va aylantirishdi. Nomard insonlarga… Sizlar kabi u insonni ham farzandlari, qo‘ni-qo‘shnisi, oilasi va quda-andasi bor. Tarqatishdan oldin viloyat hokimi lavozimida emas avvalo inson kabi ko‘rish kerak edi. Yaxshi emas bu… Tuhmatni yuki va gunohi og‘ir”, — deb yozadi u.
Farg‘ona viloyati hokimligi matbuot kotibi Dilmurod Jumaboyev esa videoni tayyorlagan va tarqatgan shaxs jinoiy javobgarlikka tortilishi kerakligini aytdi.
“Agar shuncha yil katta mas’uliyatni yelkasiga olib mehnat qilib kelayotgan butun boshli bir viloyatning hokimini bunday beta’sir shaklda xijolatga qo‘yish, „so‘z va axborot erkinligi“ bo‘ladigan bo‘lsa, bunday erkinlik kerakmi degan savolni o‘rtaga tashlash payti keldi. Gap faqat Andijon hokimida emas, insonning sha’nini toptash, uni qasddan obro‘sizlantirish maqsadida qilingan har qanday harakat og‘ir jinoyatga tenglashtirilishi shart bo‘lib qolyapti”, — deb yozdi u.
Tarmoq foydalanuvchilaridan biri Zamira Usmonova “insonni o‘zi va Alloh o‘rtasida qaysidir ma’noda siri bo‘lishi”ni ta’kidladi.
“Ana shu sir qanday mazmun yoki ko‘rinishda bo‘lmasin, buni oshkora qilishga hech kimning xakki yo‘q. Bu ishni fosh qilgan inson faqat g‘arazli maqsadini ko‘rsatib qolmay shunday bir halkparvar, mehnatkash, fidoiy, kerak bo‘lsa vatan uchun jonidan kechuvchi insonga, jonkuyar Andijonning otasiga, xalqiga xiyonat qildi”, — deya post qoldirdi u.
Hokim nomiga aytilayotgan maqtovlardan norozilar ham bo‘ldi. Xasanboy Qosimovning aytishicha, 2016-yildan boshlab Andijon viloyati “barcha sohada orqada qola boshlagan”.
“Sanoat ishlab chiqarish xajmi qisqargan. Qishloq xo‘jaligida mahsulot yetishtirish kamaygan. Ta’limda xam oldingi o‘rinlardan o‘rta va qo‘yi pog‘onaga tushgan. Lekin korrupsiya va o‘zlashtirish bo‘yicha respublikada birinchi bo‘lgan. Soxta hisobotlar orqali shu yerga yetib keldik. Tuhmat va g‘iybat deguvchilar bu hammasi rasmiy statistikadan olingan”, — dedi u.
Ma’lumot uchun, Shuhratbek Abdurahmonov 2016-yilning sentabridan buyon o‘zgarmay kelayotgan yagona viloyat hokimi hisoblanadi. U Andijon hokimligiga 2013-yil 26-aprel kuni tayinlangan.
