Uzbekistan Airports axborot xizmatiga ko‘ra, Toshkent aeroportida tez orada steril zonadagi yana bir blok foydalanishga topshiriladi, u yerda hammom, tahorat olish va namoz o‘qish xonalari, “Anjir” biznes-zali va birinchi bor kichik mehmonxona ochiladi.
“Bu shunchaki „kapsulalar“ emas, balki to‘liq bir kishilik to‘shak va minimal aksessuarlar to‘plami — chiroq, kiyim ilgichi, qo‘l yuki uchun javon, stol bo‘lgan kichik qulay kabinalar bo‘ladi. Bunday kabinalarning mohiyati shundan iboratki, yo‘lovchi kutish vaqtida aeroportdan va tranzit zonadan chiqmasdan bir necha soat davomida unda qolib dam olishi mumkin”, — deyiladi kompaniya matbuot xizmati xabarida.
Mehmonxonaga tashrif buyuruvchilar uchun ma’lumot tablosi, hammom va dush xonasi taqdim etiladi, qabulxona kechayu kunduz ishlaydi va har bir yo‘lovchiga samolyotga chiqish uchun individual taklifnoma taqdim etiladi.
Mehmonxonaning ikki qavatida 27 ta turar joy bo‘ladi. Birinchi qavatda, shuningdek, qabulxona, hammom va dush xonasi bo‘ladi. Mehmonxona sharqona uslubda quriladi. Loyiha ustida ishlash uchun dizayner Bobur Ismoilov taklif etilgan.
“Poytaxt aeroporti bizning ko‘z o‘ngimizda zamonaviy xalqaro markazga aylanmoqda va men uning o‘zgarishiga o‘z hissamni qo‘shganimdan juda xursandman. Bizning mehmonxonamiz dunyoning ko‘plab aeroportlaridagi o‘xshash mehmonxonalarga qaraganda butunlay boshqacha uslubda yaratilgan. Biz xonalarda sharqona ko‘rinish va hashamatni, shuningdek, Yevropa minimalizmi va ixchamligini saqlashga harakat qildik. Afsuski, har bir tranzit yo‘lovchi O‘zbekistonda qolib, qadimiy shaharlar va madaniyatni ko‘ra olmaydi. Shunday ekan, maqsadimiz aynan aeroportda haqiqiy sharqona muhit yaratish edi”, — deydi Bobur Ismoilov.
Mehmonxona soha professionallari (mehmonxona/mehmonxona tarmog‘i) boshqaruviga o‘tkazish rejalashtirilgan. Hududni ijaraga olish uchun tegishli lot (№4974858) E-auksion.uz elektron platformasida joylashtirilgan. Mehmonxonaning umumiy maydoni 240 kv.m, boshlang‘ich yillik qiymati 325 440 000 so‘m. Auksionda belgilangan texnik topshiriqlarga javob beradigan barcha kompaniyalar ishtirok etishi mumkin.
Foto
