22 mart kuni Toshkent shahri Olmazor tumanida «Islomobod» jome masjidi ochildi, deya xabar bermoqda Musulmonlar idorasi matbuot xizmati.

Ochilish marosimida idora raisi, muftiy Nuriddin Xoliqnazarov ulamolar, imom-xatiblar, mahalla faollari ishtirok etdi. Tumanning Sag‘bon ko‘chasidagi mazkur uch qavatli jome masjidi homiylar va saxovatpesha insonlar ko‘magida qurildi.

2019 yilning oktabrida qurilishi boshlangan masjidning xonaqohi 8 ming kishi, hovlisi va yon-atrofidagi joylar bilan birga masjid 13 ming namozxonga xizmat ko‘rsata oladi.

Tahoratxonasi esa 150 kishiga mo‘ljallangan. Bundan tashqari, ma’muriyat, kutubxona va shu kabi zarur xonalar ham barpo etilgan.

Foto: Musulmonlar idorasi, Toshkent shahri hokimligi