28 fevral kuni O‘zbekiston musulmonlari idorasi raisi, muftiy Nuriddin Xoliqnazarov raisligida respublika diniy soha xodimlarining tanqidiy-tahliliy videoselektor yig‘ilishi bo‘lib o‘tdi, deya xabar bermoqda idora matbuot xizmati.
Tanqidiy ruhda o‘tgan yig‘ilishda jarayonida mehnat intizomiga rioya etmagan, vazifasiga vijdonan yondoshmagan, mo‘min-musulmonlar ehtiyojini qondirishga jiddiy sa’y-harakat qilmagan va diniy soha xodimi maqomiga munosib bo‘lmagan bir nechta imom-xatib ishdan olindi, ayrimlariga hayfsan berildi.
Xususan, Surxondaryo viloyati bosh imom-xatibi o‘rinbosari Abdusalom Fatullayev, Qumqo‘rg‘on tumani bosh imomi va «Shoh Mashrab» masjidi imom-xatibi Hafizullo Zayniyev, Samarqand viloyati Oqdaryo tumani bosh imom-xatibi Habibulla Abloqulov va Xorazm viloyati Shovot tumani «Xo‘roz Eshon bobo» masjidi imom-xatibi Davronbek Ro‘zmetov egallab turgan vazifalaridan ozod etildi.
Jizzax viloyati bosh imom-xatibi Mehmonali Jabborov, Jizzax shahar bosh imom-xatibi Faxriddin Shayzaqov, Toshkent viloyati «Rahbar ota Akbar o‘g‘li» masjidi imom-xatibi Rahmanov Muhammadiy va Farg‘ona viloyati So‘x tumani «Oftobro‘y» masjidi imom noibi Ilhomiddin Toirovga «hayfsan» intizomiy jazosi berildi.
Bundan tashqari, Toshkent shahri «al-Hudaybiya» masjidi imom noibi Shuhrat Ziyayev mehnat intizomiga rioya etmagani uchun chora sifatida boshqa ishga o‘tkazildi.
Shuningdek, ish faoliyatdagi xato-kamchiliklar sababli o‘tgan yilda 25 nafar imom-xatib, 19 nafar imom-noibi va 2 nafar muhtasib vazifasidan ozod etilgani, shuningdek, 56 nafar imom-xatib va imom noibiga «hayfsan» intizomiy chorasi berilgani ma’lum qilindi.
«Muftiy yig‘ilishda soha xodimlari tomonidan yoshlar ta’lim-tarbiyasiga jiddiy e’tibor qaratish, xalq bilan muloqot qilish, kitob mutolaasiga targ‘ib qilish, tahdidlarga qarshi kurashish, imom-xatiblar ijtimoiy tarmoqlarda chiqish qilish odobiga amal qilish va doimiy bilim saviyalarini oshirish yuzasidan tavsiya hamda ko‘rsatmalarni bayon etdi», — deyiladi xabarda.
Eslatib o‘tamiz, avvalroq arab tili kursidagi yosh qizga yuragini sug‘urib olish bilan tahdid qilgan Toshkent tumanidagi «Eshonxo‘ja ota» masjidi imom-xatibi Avazxo‘ja Bahromov 3 sutkaga qamalgandi.
