28 февраль куни Ўзбекистон мусулмонлари идораси раиси, муфтий Нуриддин Холиқназаров раислигида республика диний соҳа ходимларининг танқидий-таҳлилий видеоселектор йиғилиши бўлиб ўтди, дея хабар бермоқда идора матбуот хизмати.

Танқидий руҳда ўтган йиғилишда жараёнида меҳнат интизомига риоя этмаган, вазифасига виждонан ёндошмаган, мўмин-мусулмонлар эҳтиёжини қондиришга жиддий саъй-ҳаракат қилмаган ва диний соҳа ходими мақомига муносиб бўлмаган бир нечта имом-хатиб ишдан олинди, айримларига ҳайфсан берилди.

Хусусан, Сурхондарё вилояти бош имом-хатиби ўринбосари Абдусалом Фатуллаев, Қумқўрғон тумани бош имоми ва «Шоҳ Машраб» масжиди имом-хатиби Ҳафизулло Зайниев, Самарқанд вилояти Оқдарё тумани бош имом-хатиби Ҳабибулла Аблоқулов ва Хоразм вилояти Шовот тумани «Хўроз Эшон бобо» масжиди имом-хатиби Давронбек Рўзметов эгаллаб турган вазифаларидан озод этилди.

имом-хатиб, мусулмонлар идораси, муфтий

Жиззах вилояти бош имом-хатиби Меҳмонали Жабборов, Жиззах шаҳар бош имом-хатиби Фахриддин Шайзақов, Тошкент вилояти «Раҳбар ота Акбар ўғли» масжиди имом-хатиби Раҳманов Муҳаммадий ва Фарғона вилояти Сўх тумани «Офтобрўй» масжиди имом ноиби Илҳомиддин Тоировга «ҳайфсан» интизомий жазоси берилди.

Бундан ташқари, Тошкент шаҳри «ал-Ҳудайбия» масжиди имом ноиби Шуҳрат Зияев меҳнат интизомига риоя этмагани учун чора сифатида бошқа ишга ўтказилди.

Шунингдек, иш фаолиятдаги хато-камчиликлар сабабли ўтган йилда 25 нафар имом-хатиб, 19 нафар имом-ноиби ва 2 нафар муҳтасиб вазифасидан озод этилгани, шунингдек, 56 нафар имом-хатиб ва имом ноибига «ҳайфсан» интизомий чораси берилгани маълум қилинди.

имом-хатиб, мусулмонлар идораси, муфтий

«Муфтий йиғилишда соҳа ходимлари томонидан ёшлар таълим-тарбиясига жиддий эътибор қаратиш, халқ билан мулоқот қилиш, китоб мутолаасига тарғиб қилиш, таҳдидларга қарши курашиш, имом-хатиблар ижтимоий тармоқларда чиқиш қилиш одобига амал қилиш ва доимий билим савияларини ошириш юзасидан тавсия ҳамда кўрсатмаларни баён этди», — дейилади хабарда.

Эслатиб ўтамиз, аввалроқ араб тили курсидаги ёш қизга юрагини суғуриб олиш билан таҳдид қилган Тошкент туманидаги «Эшонхўжа ота» масжиди имом-хатиби Авазхўжа Баҳромов 3 суткага қамалганди.