O‘zbekiston prezidenti Shavkat Mirziyoyevning «O‘zbekiston Qurolli kuchlarini qurollantirish va mudofaa sanoati sohasida davlat boshqaruvini takomillashtirish bo‘yicha chora-tadbirlar to‘g‘risida»gi farmoni imzolandi.
Hujjat bilan O‘zbekiston Qurolli kuchlarini qurollantirish bo‘yicha davlat komissiyasi tashkil etildi va quyidagilar uning asosiy vazifalari etib belgilandi:
- maxsus organlarni qurol-yarog‘, harbiy va maxsus texnika hamda boshqa harbiy va ikki xil maqsadga mo‘ljallangan mahsulotlar bilan ta’minlash bo‘yicha yaqin, o‘rta va uzoq muddatli istiqbollarni belgilash;
- O‘zbekiston Qurolli kuchlarini harbiy va ikki xil maqsadga mo‘ljallangan mahsulotlar bilan ta’minlash bo‘yicha kompleks dasturlarni ko‘rib chiqish va tasdiqlash;
- maxsus organlarni harbiy va ikki xil maqsadga mo‘ljallangan mahsulotlar bilan ta’minlashni moliyalashtirish masalalarini ko‘rib chiqish va uning manbalarini belgilash;
- davlat mudofaa buyurtmasini ko‘rib chiqish va tasdiqlash.
Shuningdek, komissiya yangi harbiy va ikki xil maqsadga mo‘ljallangan mahsulotlarni ishlab chiqarishni tashkil etish yoki mavjudlarini modernizatsiya qilish, investitsiyalarni jalb qilish va ushbu sohada davlat-xususiy sheriklikni yo‘lga qo‘yish, sohani rivojlantirish uchun imtiyozlar va preferensiyalar berish bo‘yicha takliflarni ko‘rib chiqadi.
Harbiy va ikki xil maqsadga mo‘ljallangan mahsulotlar, butlovchi buyumlar va ehtiyot qismlar, oziq-ovqat, kiyim-kechak anjomlari, dori vositalari, yonilg‘i-moylash materiallari va boshqa harbiy-texnik mol-mulkning strategik zaxiralarini yaratish choralarini belgilaydi.
Davlat komissiyasi raisi O‘zbekiston prezidenti Shavkat Mirziyoyev hisoblanadi.
Bundan tashqari, komissiya:
- mudofaa sanoatini rivojlantirish, harbiy va ikki xil maqsadga mo‘ljallangan mahsulotlar bo‘yicha yangi ishlab chiqarish quvvatlarini tashkil qilish masalalarini;
- urush davri uchun mahalliy ishlab chiqarish korxonalariga safarbarlik topshirig‘ini biriktirish bo‘yicha takliflarni;
- maxsus organlarni qurollantirish va mudofaa sanoatini rivojlantirish bo‘yicha chora-tadbirlarning bajarilishini ko‘rib chiqadi.
Shu bilan birga, Mudofaa sanoati davlat qo‘mitasi negizida Mudofaa vazirligi huzurida Mudofaa sanoati agentligi tuzildi.
Investitsiyalar, sanoat va savdo vazirligi huzurida esa O’ztextreyd davlat unitar korxonasi tuzildi. Korxona harbiy va ikki hil maqsadga mo‘ljallangan mahsulotlarning import-eksporti bilan shug‘ullanadi.
