Ayni vaqtda O‘zbekiston prezidenti Shavkat Mirziyoyev Oliy Majlisga va xalqqa murojaat qilmoqda. U o‘z nutqi davomida Qoraqalpog‘iston voqealariga ham to‘xtalib o‘tdi. Davlat rahbarining murojaatnomasi jonli efirda namoyish etilmoqda.
“Hammamiz ko‘rib-bilib turibmiz — bugun insoniyat nihoyatda murakkab davrni boshidan kechirmoqda. Yer yuzidagi iqlimning keskin o‘zgarishi, suv va tabiiy resurslar kamayishi bilan bog‘liq muammolar katta xatarlarga aylanmoqda. Xalqaro munosabatlarda o‘zaro ishonch kamayib, qarama-qarshilik va mojarolarning ortishi barqarorlik va rivojlanishga jiddiy xavf solmoqda”, — dedi u.
Prezidentning so‘zlariga ko‘ra, bunday xavf-xatarlar bizni ham chetlab o‘tmayapti.
“Qoraqalpog‘istonda sodir bo‘lgan noxush voqealar xalqimizni qattiq qayg‘uga soldi. Xudoga shukur, ko‘p millatli xalqimizning oqilligi va donishmandligi bilan vaziyat tezda izga tushdi”, — dedi u.
“Biz uchun „Qoraqalpog‘iston yutug‘i — butun O‘zbekiston yutug‘i, Qoraqalpog‘iston tashvishi — butun O‘zbekiston tashvishi“, degan g‘oya hamisha amaliy harakat dasturi bo‘lib kelgan va bundan keyin ham shunday bo‘lib qoladi. Bizning ezgu maqsadimiz — birgalikdagi mehnatimiz bilan Yangi O‘zbekistonda har tomonlama rivojlangan, obod va farovon Yangi Qoraqalpog‘istonni bunyod etishdir”, — deya ta’kidladi Shavkat Mirziyoyev.
Telegramdan foydalanasizmi? Muhim yangiliklarni o‘tkazib yubormaslik uchun kanalimizga a’zo bo‘ling.
“Asrlar davomida et va tirnoq kabi bir bo‘lib ketgan xalqlarimiz do‘stligiga, hech qanday kuch ta’sir ko‘rsata olmaydi. Chunki, bizning o‘tmishimiz bir, bugunimiz ham, kelajagimiz ham bir”, — deya qo‘shimcha qildi.
