AI-80 benzini uchun aksiz solig‘ining bekor qilinishi ushbu markadagi benzinning AYOQSHlarda sotilayotgan chakana narxining 1000−1200 so‘mga arzonlashishiga olib kelishi kerak. Bu haqda O‘zbekiston energetika vaziri o‘rinbosari Sherzod Xodjayev ma’lum qildi.
Uning qo‘shimcha qilishicha, bugungi kunda AI-80 benzining narxi 5500 so‘mgacha pasayishi kutilmoqda.
«Ta’kidlash joizki, birjaga chiqarilayotgan hajmlar ham ortgan hamda birjada boshlang‘ich narxdan 5 foizdan ortiq bo‘lmagan narxni oshirish mumkinligini inobatga olgan holda, 5500 so‘mlik narx yaqin kunlarda biz AYOQSHlarda ko‘rishimiz mumkin bo‘lgan raqam», — dedi u.
Eslatib o‘tamiz, avvalroq prezident Administratsiyasi 2 oy muddatga AI-80 benzini importi uchun aksiz solig‘i va uni chakana sotish uchun aksiz solig‘ini hisoblash va undirishni to‘xtatib turish haqida qaror qabul qilgan edi.
