Davlat xavfsizlik xizmatining hududiy boshqarmalari tomonidan qo‘shni davlatlardan O‘zbekiston hududiga olib kirilgan giyohvandlik vostilari savdosiga chek qo‘yildi.
Qayd etilishicha, DXXning Qoraqalpog‘iston Respublikasi bo‘yicha boshqarmasi xodimlari tomonidan o‘tkazilgan tezkor tadbirda To‘rtko‘l tumanida yashovchi shaxs (1988 y. t.) Samarqanddan Nukusga 2 kg 10 gr «geroin» moddasini olib kelib, xaridorga 90 ming dollarga sotayotgan vaqtida qo‘lga olingan. Ma’lum bo‘lishicha, mazkur giyohvandlik vositasi O‘zbekistonga tojikistonlik narkokur’er tomonidan o‘tkazilgan.
Foto: «O‘zbekiston 24»
Shuningdek, DXX Toshkent shahar boshqarmasi xodimlari bojxona va ichki ishlar organlari bilan hamkorlikda bir nechta tezkor tadbirlar o‘tkazishdi. Jumladan, Uchtepa tumanida yashovchi, muqaddam giyohvandlik vositalari bilan bog‘liq jinoyat sodir etganligi uchun sudlangan shaxsning (1964 y. t.) yashash xonadoni belgilangan tartibda ko‘zdan kechirilganda, uyning shift qismiga yashirib qo‘yilgan 1 kg 924 gr «opiy» moddasi borligi aniqlanib, protsessual tartibda rasmiylashtirib olindi, deyiladi xabarda.
Foto: «O‘zbekiston 24»
Ma’lum bo‘lishicha, ushbu modda uchinchi shaxslar tomonidan Tojikistondan keltirilgan. Xonadonda tegishli hujjatlari bo‘lmagan 1 dona pnevmatik pistolet ham borligi ma’lum bo‘lgan.
Qayd etilishicha, Uchtepa tumanida kuzatilgan boshqa bir holatda Tojikistondan aylanma yo‘llar bilan o‘tkazilgan narkotik moddalarni Toshkentga olib kelib sotish bilan shug‘ullangan, Surxondaryo viloyatida tug‘ilgan 3 nafar shaxsning noqonuniy faoliyatiga chek qo‘yilib, ulardan 943 gr «gashish» moddasi protsessual tartibda rasmiylashtirib olingan.
Foto: «O‘zbekiston 24»
Bundan tashqari, Qirg‘izistondan noqonuniy yo‘llar bilan mamlakat hududiga o‘tkazilgan narkotik moddalar va kuchli ta’sir qiluvchi dori vositalari ham aniqlandi. Jumladan, Farg‘ona viloyatining Farg‘ona tumanida yashovchi, 1976 va 1997 yillarda tug‘ilgan ikki fuqaro kelayotgan «Lasetti» rusumli avtotransport vositasi poytaxtga kiraverishdagi «SHARQ» YPX maskanida to‘xtatilib, ko‘zdan kechirilganda, avtomashina salonida 939 gr «gashish» moddasi borligi aniqlandi hamda tegishli tartibda rasmiylashtirib olindi, deyiladi xabarda.
Foto: «O‘zbekiston 24»
Shuningdek, DXX xodimlari tomonidan Bojxona qo‘mitasining Toshkent shahar boshqarmasi bilan hamkorlikda o‘tkazilgan tezkor tadbirda Toshkentda yashovchi, 1977 va 1995 yillarda tug‘ilgan 2 fuqaro Chilonzor tumanida xaridorga 560 dona «Regapen» hamda 100 dona «Tropikamid» kuchli ta’sir qiluvchi dori vositalarini 26 mln so‘mga sotayotgan vaqtida qo‘lga olingan.
Foto: «O‘zbekiston 24»
Ularning sherigi, 2002 yilda tug‘ilgan yana bir shaxs ham ushlanib, uning vaqtincha yashash xonadonidan 1540 dona «Regapen», 630 dona «Tropikamid» hamda 30 dona «Selofen» kuchli ta’sir qiluvchi dori vositalari o‘rnatilgan tartibda olib qo‘yildi, deyiladi xabarda.
Foto: «O‘zbekiston 24»
Qayd etilishicha, DXX Farg‘ona viloyati bo‘yicha boshqarmasi xodimlari bojxona va ichki ishlar organlari bilan birgalikda o‘tkazilgan tezkor tadbirda «Farg‘ona-Namangan» yo‘nalishida harakatlanayotgan, 1990 yilda tug‘ilgan shaxs boshqaruvidagi avtomashina Yozyovon tumani hududida to‘xtatilib, ko‘zdan kechirilgan.
Foto: «O‘zbekiston 24»
Natijada uning salon qismida mamlakatda muomalasi cheklangan narkotik moddalar turkumiga kiruvchi 1920 dona «Tramadol» dori vositasi, shuningdek, dorixonalarda shifokor retsepti asosida sotilishi lozim bo‘lgan 4704 dona «Regapen» va 150 dona «Tropikamid» kuchli ta’sir qiluvchi dori vositalari borligi aniqlandi.
Foto: «O‘zbekiston 24»
«Quvasoy-Toshkent» yo‘nalishida harakatlanayotgan avtomashina «Namangan» YPX maskanida to‘xtatilib ko‘zdan kechirilganda, unda Quvasoy shahrida yashovchi, 1997 yilda tug‘ilgan shaxsga tegishli 840 dona «Regapen» va 240 dona «Tropikamid» kuchli ta’sir qiluvchi dori vositalari borligi ma’lum bo‘ldi hamda protsessual tartibda olib qo‘yildi.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
