O‘zbekiston prezidenti Shavkat Mirziyoyev Birlashgan Arab Amirliklari prezidenti, Abu Dabi amiri Shayx Xalifa bin Zoid Ol Nahayonning vafot etgani munosabati bilan ta’ziya bildirish uchun 15 may kuni tashrif bilan ushbu mamlakatda bo‘ldi, deya xabar qildi davlat rahbari matbuot xizmati.
Abu Dabidagi Prezident majmuasida davlat rahbari BAAning yangi saylangan prezidenti Muhammad bin Zoid Ol Nahayon bilan uchrashdi.
Uchrashuv avvalida mamlakat yetakchisi Amirliklar prezidenti va do‘st xalqiga prezident Xalifa bin Zoid Ol Nahayonning bevaqt vafot etgani munosabati bilan chuqur hamdardlik bildirdi. Shayx Xalifa mamlakatlar o‘rtasidagi do‘stlik va ko‘p qirrali hamkorlik munosabatlarini rivojlantirish va mustahkamlashga ulkan hissa qo‘shgani alohida qayd etildi, deyiladi xabarda.
Shuningdek, prezident Shayx Muhammad Ol Nahayonni oliy davlat lavozimiga saylangani bilan tabriklab, kelgusi faoliyatiga katta muvaffaqiyatlar tiladi.
Yetakchilar O‘zbekiston va Amirliklar o‘rtasidagi amaliy hamkorlikni kengaytirishning dolzarb masalalarini ko‘rib chiqdilar.
Davlat rahbari BAA tashqi ishlar vaziri Abdulla bin Zoid Ol Nahayon hamda bosh vaziri o‘rinbosari, prezident ishlari bo‘yicha vaziri Mansur bin Zoid Ol Nahayon bilan ham uchrashuvlar o‘tkazdi.
Prezident Shavkat Mirziyoyev Birlashgan Arab Amirliklariga tashrifini yakunlab, Toshkentga qaytib keldi.
