AQSH Federal qidiruv byurosi har o‘n soatda Xitoyga qarshi yangi tergov o‘tkazmoqda
AQSH Federal qidiruv byurosi (FQB) Xitoyga qarshi 2000 dan ortiq turli xil tergovlarni olib bormoqda, har o‘n soatda yangi “xitoy ishi” ochilmoqda. Bu haqda FQB rahbari Kristofer Rey ma’lum qildi. Uning ta’kidlashicha, hozirgi kunda dunyodagi hech bir davlat AQSHning iqtisodiy xavfsizligi va demokratik g‘oyalariga Xitoydan ko‘ra ko‘proq tahdid solayotgani yo‘q, uning mamlakat institutlariga ta’sir o‘tkazish qobiliyati, Reyning so‘zlariga ko‘ra, “yirik, keng va mustahkam”. FQB ma’lumotlariga ko‘ra, Xitoy AQSH hududida Foxhunt (Tulki ovi) nomli operatsiya o‘tkazmoqda. Ushbu operatsiya doirasida Xitoy AQSHda yashovchi etnik xitoyliklarni qo‘rqitish va shantaj qilish uchun “muvofiqlashtirilgan noqonuniy harakatlar"ni amalga oshirmoqda. “Bu ushbu tahdidning qanchalik murakkab va ko‘p qirrali ekanligidan dalolatdir”, dedi u. AQSH milliy razvedkasi direktori Evril Xeynsning aytishicha, Xitoy “muhim kiber qobiliyatlarga ega”. Va agar u Xitoy tomonidan ishlatilsa, “hech bo‘lmaganda AQSH ichidagi hayotiy infratuzilmalar faoliyatida mahalliy va vaqtinchalik buzilishlarni keltirib chiqarishi mumkin”, deya qo‘shimcha qildi Xeyns. Xitoy hukumati bunday da’volarni rad etib, ularning paydo bo‘lishini Vashingtonning Pekinga nisbatan “yashirin niyatlari” bilan izohladi. — CNN.
Hindiston va Pokiston yanvar oyida Kashmirdagi vaziyat bo‘yicha yashirin muzokaralar o‘tkazgan
Hindiston va Pokiston tashqi razvedka xizmatlarining yuqori martabali vakillari yanvar oyida Dubayda ittifoqdosh Jammu va Kashmir hududlaridagi harbiy ziddiyatlarni hal qilish bo‘yicha yashirin muzokaralar o‘tkazdilar. Reuters’ning yozishicha, ikki mamlakat vakillarining uchrashuvi BAA hukumati ko‘magida Dubayda bo‘lib o‘tgan. Manbalarga ko‘ra, muzokaralar natijasida ikki mamlakat hukumatlari tomonidan nazorat chizig‘i hududida o‘t ochishni to‘xtatish, 2021 yilda bahsli hududning o‘z qismlarida saylovlar o‘tkazishga kelishib oldilar. Hindiston Tashqi ishlar vazirligi va Pokiston armiyasi ushbu bayonotga izoh berishdan bosh tortdi.
1947 yildan buyon, ya’ni Britaniya Hindistoni mustaqillikka erishgandan so‘ng diniy yo‘nalish bo‘yicha ikki davlatga bo‘linganidan beri Kashmir Hindiston va Pokiston o‘rtasida bahs mavzusi bo‘lib kelmoqda. Ayni paytda Kashmirda davlat chegarasi yo‘q, uning hududi nazorat chizig‘i bilan bo‘lingan. — Reuters.
Gruziya va Bolgariya o‘z harbiylarini Afg‘onistondan olib chiqishini e’lon qilishdi
NATO ortidan Gruziya hukumati alyans bilan kelishilgan jadvalga muvofiq Afg‘onistondagi barcha harbiy kontingentlarini olib chiqib ketadi. Bu haqda Gruziya bosh vaziri Irakliy Garibashvili o‘zining Facebook’dagi sahifasida yozdi. NATO Afg‘onistondagi missiyasini shu yilning sentyabr oyigacha tugatish to‘g‘risida qaror qabul qildi. Shunga ko‘ra, Gruziya bo‘linmalari Afg‘onistonni NATO bilan belgilangan jadvalga binoan tark etadi", deb yozdi va Afg‘onistonda bugungi kunda 860 gruziyalik tinchlikparvar kuchlari qatnashayotganini qo‘shimcha qildi.
Bolgariya ham AQSH ma’muriyati va NATO ittifoqchilarining shunday qaroridan so‘ng Afg‘onistondagi harbiy kontingentini olib chiqib ketadi. Bu haqda mamlakat bosh vaziri Boyko Borisov ma’lum qildi. “Bugun biz dastlabki munozarani o‘tkazdik, yaqin kelajakda [hukumatning] navbatdan tashqari yig‘ilishini o‘tkazamiz va o‘z kontingentimizni Afg‘onistondan olib chiqib ketamiz”, dedi Borikov. Hozirda Afg‘onistonda 120 bolgariyalik harbiy xizmatchi Kobuldagi missiya shtab-kvartirasida harbiy bazalarning tashqi perimetrini, shu jumladan Bagram aerodromini himoya qilish bo‘yicha vazifalarni bajarmoqda. — TASS.
Minnesotada afroamerikalik Raytning o‘limi yuzasidan ketma-ket to‘rtinchi kun norozilik namoyishlari davom etmoqda
Minnesota shtatining Bruklin markazidagi tartibsizliklar afroamerikalik Dante Rayt vafotidan beri ketma-ket to‘rtinchi kun davom etmoqda. 14 aprel kuni SNN telekanalining xabariga ko‘ra, ba’zi namoyishchilar o‘zini tajovuzkor tarzda tutishmoqda, rasmiylar namoyishchilarni uylariga ketishga chaqirishmoqda. Bruklin markazida soat 22:00dan soat 06:00gacha komendantlik soati joriy etildi. Namoyishchilarning aksariyati Bruklin markazining politsiya bo‘limi yaqinida yig‘ilgan. Ma’lumotlarga ko‘ra, namoyishchilar politsiya bo‘limi atrofida o‘rnatilgan to‘siqdan o‘tishga harakat qilishmoqda. Ba’zilari politsiyaga turli xil narsalarni otmoqda. Huquqni muhofaza qilish organlari xodimlari olomonni tarqatish uchun ko‘zdan yosh oqizuvchi gaz, eskirgan granatalar va rezina o‘qlardan foydalanishga majbur bo‘ldilar. Hammasi bo‘lib bir necha yuz kishi norozilik aksiyalarida qatnashmoqda. Mahalliy hokimiyat politsiyaning uyga qaytish talablariga bo‘ysunmagan namoyishchilarni hibsga olishlari to‘g‘risida ogohlantirdi. 14 aprel kuni shaharda 60 dan ortiq odam hibsga olingan. — CNN.
Xitoy TIV yaponiyalik siyosatchilarga Fukusima-1 AESdagi suvni ichishni taklif qildi
Xitoy TIV vakili Chjao Litszyan 15 aprel kuni o‘tkazilgan navbatdagi brifingda Yaponiya siyosatchilarini aholini xavfsizlikda ishontirish uchun Fukusima-1 AESdan chiqqan suvni shaxsan ichib ko‘rishga va ovqat tayyorlashda foydalanishga chaqirdi. Uning so‘zlariga ko‘ra, Yaponiyadagi ba’zi siyosatchilar AESdagi suv xavfsizligini “mashaqat bilan isbotlashga haqarat qilishmoqda”. “Unda ular suvdan ichish, shuningdek, ovqat tayyorlash, kiyim yuvish va sug‘orish uchun foydalanishni boshlashsin”, dedi u.
Chjao Litszyanning ta’kidlashicha, nemis olimlari radioaktiv moddalar chiqadigan bo‘lsa, Fukusima sohilidagi eng kuchli dengiz oqimlari ularni atigi 57 kun ichida Tinch okeanining katta qismida yoyib yuborishi mumkin bo‘lgan vaziyatni modellashtirishgan. 10 yil ichida bunday moddalar dunyoning barcha okeanlariga yetib boradi. — TASS.
Belarusdagi saylovlardan so‘ng norozilik namoyishlari bilan bog‘liq 3 mingdan ortiq jinoyatlar qayd etilgan
O‘tgan yil avgust oyida bo‘lib o‘tgan prezident saylovlaridan so‘ng Belarusda ruxsatsiz norozilik aksiyalari bilan bog‘liq uch mingdan ortiq jinoyatlar qayd etilgan. Bu haqda davlat Bosh prokuraturasi xabar berdi. “O‘tgan davrda noqonuniy ommaviy tadbirlar va norozilik namoyishlarini tashkil etish va o‘tkazish bilan bog‘liq 3 mingdan ortiq jinoyatlar ro‘yxatga olingan. Shulardan: 750 dan ziyod inshootlarni tahqirlash va mulkka zarar yetkazish, 600 ga yaqin davlat amaldorlarini haqorat qilish, militsiya xodimlariga nisbatan 300 dan ortiq zo‘ravonlik yoki zo‘ravonlik bilan tahdid qilish holatlari”, — dedi respublika Bosh prokurorining o‘rinbosari. — Bosh prokuraturaning Telegram’dagi kanali.
AQSh Rossiyaga qarshi yangi sanksiyalarni eʼlon qildi
15 aprel kuni AQSh prezidenti Jo Bayden Rossiya hukumatining “zararli tashqi faoliyati” tufayli yangi sanksiyalarni joriy etish toʻgʻrisidagi farmonni imzoladi. Oq uy maʼmuriyatining fikriga koʻra, sanksiyalar Rossiyaning AQSh saylovlariga aralashishga urinishlar, AQSh hukumat tarmoqlariga qilingan kiberhujumlar, dissidentlar va jurnalistlarga qarshi eksterritorial harakatlar va boshqalar sanab oʻtilgan holda “beqaror holatga keltiruvchi xalqaro harakatlari” uchun deb koʻrsatilgan. 14 iyundan AQSh moliya institutlariga Rossiya markaziy banki va Rossiya moliya vazirligidan, shuningdek Milliy farovonlik jamgʻarmasidan qimmatli qogʻozlarini bevosita sotib olish taqiqlanadi. Bundan tashqari, AQSh oʻn nafar rossiyalik diplomatni Vashingtondan chiqarib yubormoqda. Oq uy ularni Rossiya maxsus xizmatlari xodimi demoqda. AQSh moliya vazirligi esa Rossiyaning 32 yuridik va jismoniy shaxslariga qarshi shaxsiy sanksiyalar eʼlon qildi. Rossiyaning Qrimdagi harakatlari sababli yana sakkizta jismoniy va yuridik shaxslarga nisbatan sanksiya qoʻllanildi. AQSh hukumati, shuningdek, oʻtgan yili AQSh davlat idoralariga qilingan xakerlik hujumida Rossiyaning Tashqi razvedka xizmatini (SVR) rasmiy ravishda aybladi. — Gazeta.uz
