Misrda uch ming yillik shahar topildi
Zaxi Xavass boshchiligidagi Misr arxeologlari bundan 3000 yil oldin qum ostida yo‘qolgan Luksor yaqinida Misrning qadimiy shaharini topishdi. Bu shahar Misrning eng buyuk hukmdorlaridan biri, miloddan avvalgi 1391 yildan 1353 yilgacha Misrni boshqargan 18-sulolaning to‘qqizinchi qiroli Amenxotep III tomonidan asos solingan. “Ko‘plab xorijiyliklar ushbu shaharni qidirishdi, ammo topolmadilar”, dedi Xavass. “Ularning ba’zi devorlari 3 metr balandlikda. Aytish mumkinki, shahar g‘arbiy tomonga, mashhur Dayr Al-Madinagacha cho‘zilgan”, deya qo‘shicha qildi u. Qazuv ishlari 2020 yil sentyabr oyida boshlandi. Natijada, arxeologlar deyarli butun devorlari va xonalari kundalik narsalar bilan to‘ldirilgan katta shaharni topishdi. U “Yo‘qolgan oltin shahar” deb nomlandi. — Ahram Online.
Yaponiya Fukusimadan tozalangan radioaktiv suvni okeanga oqizadi
Yaponiya hukumati Fukusima AESdan tozalangan radioaktiv suvni okeanga oqizishga qaror qildi. Hukumat komissiyasi buni o‘tgan yili amalga oshirishni tavsiya qilgan, ammo bu qaror, xususan, baliq ovlovchilar orasida keng noroziliklarni keltirib chiqargan edi. Ularning fikricha, iste’molchilar ushbu hududda tutilgan dengiz maxsulotlaridan voz kechishiga olib keladi. NHK telekanalining xabar berishicha, Fukusimadan chiqadigan suv chiqindilari hozirda ixtisoslashgan suv omborlarida saqlanmoqda, ular tozalangan, ammo tarkibida radioaktiv tritiy bor. “Manbalarda aytilishicha, hukumat ushbu element darajasini xalqaro standartlarga muvofiq pasaytirmoqchi. Va shundan so‘ng, ya’ni ikki yildan keyin suvlar okeanga oqiziladi”, — deyiladi telekanal bayonotida.
2011 yil mart oyida Yaponiyaning shimoliy-sharqiy qirg‘og‘idagi zilzila sunamini keltirib chiqargan edi. Fukusima-1 AESga ulkan to‘lqin urilishi natijasida 1986 yilda Chernobil AESidagi avariyadan buyon shu kabi eng katta avariya sodir bo‘ldi. Milliy politsiya agentligining ma’lumotlariga ko‘ra, 2011 yilda sodir bo‘lgan tabiiy ofat 15,9 ming kishining o‘limiga sabab bo‘lgan, 2,5 ming kishi hanuzgacha bedarak yo‘qolgan. — Kyodo.
Norvegiya bosh vaziri karantin cheklovlarini buzganligi uchun 2352 dollar miqdorida jarimaga tortildi
Norvegiyada mamlakat bosh vaziri Erna Sulberg fevral oyida karantin cheklovlarini buzganligi uchun 20000 krona (2352 dollar, 2000 yevroga yaqin) miqdorida jarimaga tortildi. Avvalroq, mahalliy OAV bosh vazir fevral oyining oxirida o‘zining 60 yoshi munosabati bilan tog‘dagi kurortda oilaviy ta’til uyushtirganini va 13 nafar qarindoshini taklif qilganini aniqladilar. Uning o‘zi bayramda bo‘lmagan. Ertasi kuni bosh vazir bilan birga 14 kishi ijaraga olingan kvartirada to‘plandilar. Ushbu davr mobaynida mamlakatda guruh bo‘lib to‘planishga taqiq qo‘yilgan edi. Yig‘ilishlarda ko‘pi bilan 10 kishiga ruxsat berilgan. Qoidabuzarlik to‘g‘risidagi ma’lumotlar tarqalganidan so‘ng, Sulberg kechirim so‘radi. Shundan keyin unga qarshi tergov boshlandi. Politsiya odatda bunday qonunbuzarliklar uchun jarima solmasa ham, bosh vazir uchun istisno qilingan, deydi politsiya vakili Ule Severud. — Bloomberg.
Shimoliy Koreyada shikoyatlar va sekin ishlashi sababli amaldor shaxs qatl etildi
Shimoliy koreyalik amaldor shikoyatlar va sust ishlashi tufayli qatl etildi. Pak ismli amaldor Shimoliy Koreyada masofaviy ta’limni tashkil etish bo‘yicha maxsus komissiya raisi etib tayinlangan edi. Biroq zarur resurslar va uskunalar yetishmasligi sababli, bu masala deyarli yuzaga chiqmadi. Pak bu holatdan mamnun bo‘lmasdan, bu haqda doimiy ravishda komissiyaning boshqa a’zolariga shikoyat qilar edi. Ulardan biriga ko‘ra, Kim Ir Sen universiteti raisi Ri Guk Chxol amaldorni qoralagan. Pak mart oyida “ta'lim sohasidagi partiyaga va inqilobga qarshi faoliyat"da ayblanib qatl etilgan. Komissiyada bo‘lgan yana 20 nafar professor endi “mafkuraviy tekshiruvdan” o‘tmoqda. Tuzilma qayta tashkil etildi: hozirda unda 180 a’zo va uchta kichik qo‘mita mavjud. Yangi komissiyani Ri Guk Chxol boshqarmoqda. — Daily NK.
Tbilisida siyosiy inqirozga qarshi miting bo‘lib o‘tmoqda
Minglab namoyishchilar 9 aprel kuni Tbilisidagi Yevropa maydoniga olti oy davom etayotgan mamlakatning siyosiy inqiroziga qarshi norozilik va barqarorlikni targ‘ib qilish uchun chiqishdi. “Bu hech kim hech narsani so‘ramaydigan Gruziya. Bu hamma narsaga uzoq vaqtgacha chidab kelayotgan Gruziya”, — dedi miting tashkilotchisi, Gruziyalik qo‘shiqchi Giya Gachechiladze namoyishchilar oldida. Namoyishchilar hokimiyat va muxolifatni o‘zlarining partiyaviy manfaatlaridan voz kechishga, parlamentda ishlashni boshlashga va odamlarning muammolarini hal qilishga chaqirmoqdalar. Ular, shuningdek, vaqt o‘tishi bilan siyosatchilar aholining haqiqiy muammolaridan uzoqlashadilar va shu bilan begonalashish tuyg‘usini yaratadilar, deb ta’kidlashdi. Ularning so‘zlariga ko‘ra, mamlakatda oppozitsiya va hokimiyatdan tashqari aholining katta qismi ham bor, ularning ehtiyojlari hech kimni qiziqtirmaydi. — TASS.
Vaksinalar taqsimlanishida “hayratlanarli nomutanosiblik” kuzatilmoqda — JSST
Dunyo davlatlari orasida ma’lum bir davlatning daromad darajasi bilan belgilanadigan COVID-19 koronavirusiga qarshi vaksinalarning juda notekis taqsimoti mavjud, dedi JSST bosh kotibi Tedros Gebreyesus. “700 mlndan ortiq dozada COVID-19 vaksinalari dunyo miqyosida tarqatilgan, ammo ularning 87 foizdan ortig‘i yuqori va o‘rta daromadli mamlakatlarga, atigi 0,2 foizi kam daromadli mamlakatlarga yuborilgan”. “O‘rtacha yuqori daromadli mamlakatlarda deyarli har to‘rtinchi kishi COVID-19 vaksinasini olgan. Kam daromadli mamlakatlarda bu 500 dan ortiq kishidan biri”, — deya qo‘shimcha qildi u. JSST rahbarining so‘zlariga ko‘ra, hozirgi vaqtda dunyoning 194 mamlakati koronavirusga qarshi emlashni boshlagan, 26 tasi esa hali boshlamadi. Ammo, dedi Gebreyesus, dunyodagi aksariyat mamlakatlar o‘z aholisi orasida xavf ostidagi guruhlarni yetarli darajada emlashmagan va “vaksinalarni taqsimlashda hayratlanarli nomutanosiblik saqlanib qolmoqda”. Uning ta’kidlashicha, so‘nggi olti hafta mobaynida xalqaro COVAX dasturi orqali 38 mlndan ortiq dozada vaksinalar 100 dan ortiq mamlakatlarga yetkazib berildi. Biroq, uning ta’kidlashicha, reja 50 foizdan kam bajarilgan. — Interfaks.
