Rossiya tashqi ishlar vaziri Yevropa Ittifoqi bilan aloqalarni uzishga tayyorligini ma’lum qildi
Agar Bryussel Rossiya iqtisodiyotining zaif tarmoqlariga qarshi sanksiyalarni qo‘llasa, Rossiya Yevropa Ittifoqi bilan munosabatlarni buzishga tayyor. Bu haqda Rossiya tashqi ishlar vaziri Sergey Lavrov jurnalist Vladimir Solovyovga bergan intervyusida aytib o‘tdi.
Vladimir Solovyov vazirga savol berdi: “Biz Yevropa Ittifoqi bilan aloqalarni uzishgacha boramizmi?”
“Biz tayyor ekanligimizdan kelib chiqamiz, — deb javob berdi Lavrov. — Agardaki biz iqtisodiyotimiz uchun xavf tug‘diradigan ba’zi tarmoqlarga, shu jumladan, eng zaif sohalarga qarshi sanksiyalar qo‘llanilishini yana bir bor ko‘rsak. Biz o‘zimizni dunyo hayotidan ajratib qo‘yishni xohlamaymiz, lekin bunga tayyor bo‘lishimiz kerak. Agar tinchlik istasang, urushga tayyor bo‘l!”
Bir kun oldin, Yevropa Ittifoqining Rossiyaga qarshi yangi sanksiyalarini joriy qilish haqida ma’lum bo‘ldi, ularni keyingi oyda joriy etish rejalashtirilgan. Ma’lumotlarga ko‘ra, Yevropa bloki mamlakatlari o‘rtasida bu borada umumiy kelishuv mavjud. Yevropa Ittifoqi Lavrovning bayonotiga e’tibor qaratdi. “Yevropa Ittifoqi Rossiya tashqi ishlar vazirining Yevropa Ittifoqi bilan aloqalar to‘g‘risidagi bayonotiga e’tibor qaratdi. Shuningdek, biz Kremlning izohlarini inobatga olamiz, bu haqda Yevropa Ittifoqi Kengashida muhokama qilamiz”, — dedi Yevropa Ittifoqining tashqi siyosat xizmati vakili Piter Stano. — Rossiya Tashqi ishlar vazirligi (video).
Myanma harbiylari 23 mingdan ortiq mahbuslarni afv etdi
Myanma harbiylari 12 fevral kuni 23 mingdan ortiq mahbuslarning afv etilishini e’lon qildi. “Myanma mahbuslarni munosib fuqarolarga aylantirish, jamoatchilikni xursand qilish uchun tinchlik, taraqqiyot va tartib bilan yangi demokratik davlat yaratayotganda <...>, Davlat boshqaruv kengashi konstitutsiyaga muvofiq, har qanday huquqbuzarliklar uchun 2021 yil 31 yanvargacha olingan jazolarning amnistiyasini e’lon qilmoqda”, — deyiladi hujjatda. Afv etish 23 314 mahbusga ta’sir qiladi, shu jumladan 55 chet ellik fuqarosiga. Shuningdek, mamlakatda o‘lim jazosi umrbod ozodlikdan mahrum qilish, umrbod ozodlikdan mahrum qilish esa 40 yillik qamoq jazosiga almashtirildi. Harbiylar hukumatga kelganidan keyin 262 kishi (sobiq hukumat a’zolari) hibsga olingan. Ayni paytda 241 kishi hali ham hibsda, shu jumladan ikki kishi qamoq jazosiga hukm qilingan. — CNN.
Taxminan 300 mln amerikaliklar iyul oxiriga qadar koronavirusga qarshi emlanadi
AQSHda iyul oyi oxiriga qadar 300 mln amerikalikni yangi koronavirusga qarshi emlash uchun yetarli miqdorda vaksina zaxiralari mavjud. Bu haqda 11 fevral kuni AQSH prezidenti Jo Bayden Milliy sog‘liqni saqlash institutida so‘zlagan nutqida ma’lum qildi. “Biz hozirda iyul oyi oxiriga qadar 300 million amerikalik uchun yetarlicha [vaksina] zaxiralari bilan ta’minlanmoqdamiz”, — dedi Bayden. Shuningdek, uning ma’muriyati AQSH ishlab chiqaruvchilari Pfizer va Moderna kompaniyalaridan har biri 100 million dozada vaksina sotib olish bo‘yicha shartnomalar imzolaganini aytdi. Milliy institutlarning ta’kidlashicha, ishlab chiqaruvchilarning har biri 2021 yil iyul oyining oxiriga qadar jami 300 mln dozali vaksinalarni yetkazib beradi. 2019 yilgi ma’lumotlarga ko‘ra, mamlakatda 328,2 mln kishi yashaydi. — TASS.
Kim Chen In o‘z kabinetini KXDRning iqtisodiy tanazzullari uchun tanqid qildi
KXDR yetakchisi Kim Chen In bosh iqtisodchini ishdan bo‘shatdi va iqtisodiyotni saqlab qolish uchun yangi g‘oyalar yo‘qligi uchun o‘zining kabineti ishini tanqid qildi. “Vazirlar Mahkamasi muhim iqtisodiy yo‘nalishlar rejasini tuzishda yetakchi rol o‘ynay olmadi va vazirliklar tomonidan tayyorlangan raqamlarni deyarli mexanik ravishda birlashtirdi”, — deya Kim Chen Inning so‘zlarini keltirgan AR. Kim Chen Inning ta’kidlashicha, Vazirlar Mahkamasining rejalari ishlamayapti, innovatsion g‘oyalar esa mavjud emas. Bu yil qishloq xo‘jaligi mahsulotlarini ishlab chiqarish bo‘yicha maqsadlar, Shimoliy Koreya rahbarining so‘zlariga ko‘ra, haqiqatdan ham yuqori, elektr energetikasi uchun esa juda past. Associated Press’ning ta’kidlashicha, Kim Chen In prezidentlik lavozimidagi to‘qqiz yillik faoliyati davomida eng og‘ir inqirozga uchragan. AQSH sanksiyalarini bekor qilish bo‘yicha diplomatik harakatlar hech qanday samara bermadi, pandemiya sababli chegaralar yopildi va tabiiy ofatlar hosilning muhim qismini yo‘q qildi. Bundan tashqari, KXDRning Xitoy bilan savdosi qiyin davrni boshidan kechirmoqda, deya yozmoqda nashr. BMT ma’lumotlariga ko‘ra, 2019 yilda KXDR aholisining 40 foizi oziq-ovqatga muhtoj bo‘lgan. — Associated Press.
Turkmaniston prezidentining o‘g‘li mamlakat bosh vaziri o‘rinbosari etib tayinlandi
Turkmaniston prezidenti Gurbanguli Berdimuhamedov o‘g‘li Serdar Berdimuhamedovni sanoat va qurilish ishlab chiqarish vaziri lavozimidan ozod qilib, bosh vazir o‘rinbosari etib tayinladi. Mamlakat prezidenti hukumatga Vazirlar Mahkamasi raisining boshqa o‘rinbosari lavozimini Davlat xavfsizlik kengashi va Oliy nazorat palatasi raisi etib tayinlash bilan kiritdi. Bosh vazirning yangi o‘rinbosari, shuningdek, davlat boshqaruvi tizimida, moliya-iqtisodiy sektorda va ijtimoiy sohada raqamlashtirish va innovatsion texnologiyalarni joriy qilish uchun javobgar bo‘ladi. Shuningdek, prezidentning yangi lavozim maqomi to‘g‘risidagi farmoniga binoan Vazirlar Mahkamasida Nazorat bo‘limi tashkil etiladi. — ORIENT.
Facebook AQSH hukumatiga Vashingtondagi tartibsizliklar ishtirokchilarini aniqlashda yordam berdi
Facebook AQSH huquq-tartibot idoralariga Vashington markazidagi tartibsizliklar ishtirokchilarini aniqlashda yordam berdi. Bu haqda kompaniyaning tartibga solish bo‘limi rahbari Monika Bikert ma’lum qildi. Uning ta’kidlashicha, Facebook “tartibsizliklar tugaganidan so‘ng ham” tergovchilarga yordam bergan. Bikertning aniqlik kiritishicha, kompaniya xodimlari tartibsizliklarda qatnashganlar tomonidan e’lon qilingan fotosuratlarni tahlil qilishgan. Agentlikning ta’kidlashicha, kompaniya bu maqsadda yuzni aniqlash uchun ixtisoslashtirilgan dasturlardan foydalanmagan. Shu bilan birga, Facebook ma’muriyati AQSH rasmiylarining ma’lumot olish uchun so‘rovlarini qondirgan. Shuningdek, kompaniya yangi tartibsizliklarga chaqiruvchi xabarlarni olib tashlagan, dedi Bikert. — Bloomberg.
