Xitoy fuqaro aviatsiyasi regulyatori (CAAC) «O‘zbekiston havo yo‘llari»ning Toshkent-Cian yo‘nalishi bo‘yicha parvozlarini vaqtincha to‘xtatdi. Bu haqda Sinxua yangiliklar agentligi xabar berdi. Bunga 5 noyabr kuni amalga oshirilgan reysning 11 yo‘lovchisida COVID-19 testining ijobiy natijasi aniqlangani sabab bo‘lgan.
HY501 reysining to‘xtatilishi 23 noyabrdan boshlab to‘rt hafta davom etadi, deyiladi xabarda.
Agar mamlakatga yetib kelgan barcha havo yo‘lovchilarida ketma-ket uch hafta davomida koronavirus tasdiqlanmasa, u holda aviakompaniya parvozlar sonini haftasiga ikkitaga ko‘paytirish uchun ruxsat oladi.
Agar COVID-19 ga topshirilgan test ijobiy natijalari 5 taga yetsa, u holda ushbu parvoz bir haftaga to‘xtatiladi. Agar bunday yo‘lovchilar soni 10 taga yetadigan bo‘lsa, u holda ushbu yo‘nalishdagi parvozlar to‘rt hafta davomida to‘xtatiladi.
Agentlik «O‘zbekiston havo yo‘llari» aviakompaniyasi bekor qilingan parvoz kvotalarini boshqa yo‘nalishlarga o‘tkazishga haqli emasligini ta’kidladi.
