Ипотекани қайта молиялаштириш компанияси (ИҚМК) тижорат банкларига кредит ресурслари ажратиш тўхтатилгани бўйича хабарларни рад этди.
Аввалроқ Telegram каналларда банклар ИҚМК маблағларидан иккиламчи бозорда уй-жой сотиб олиш учун 17−18 фоиз ставкада ажратиладиган «арзон» ипотека кредитларини беришни тўхтатгани ҳақида хабарлар пайдо бўлганди.
«Компания тижорат банкларига 17−18 фоизлик ипотека кредитлари учун ресурслар ажратишда давом этиб келмоқда», — дея таъкидлаган ИҚМК.
ИҚМК 2022 йил 14 майда Осиё тараққиёт банкидан (OТБ) 150 млн доллар миқдорида кредит жалб қилинганини эслатган. Банкларга имтиёзли ставкадаги маблағлар аввалгидек шу кредит линияси ҳисобига ажратилмоқда. Ўз навбатида, банклар компанияга мувофиқ талаблар асосидаги портфелларини босқичма-босқич тақдим этмоқда.
OTБ 2019 йилда ҳам аҳолининг уй-жойга бўлган эҳтиёжини қондириш мақсадида банкларни молиялаштириш учун компанияга 150 млн доллар ажратганди. Режага кўра, ушбу маблағлар 2023 йилнинг биринчи чораги охиригача босқичма-босқич ишлатилиши керак эди, бироқ талаб юқори бўлгани сабабли маблағ бир йил аввал тугади.
Ипотека кредитини қайта молиялаштириш қандай ишлайди?
Ипотека қайта молиялаштириш компанияси маҳаллий ва халқаро капитал бозорларида молиявий ресурсларни жалб қилади ва кейинчалик уларни ипотека кредитларини қайта молиялаш учун банкларга йўналтиради. Банклар компания шартлари асосида, ипотека кредитлари, ипотека шартномалари бўйича талаб ҳуқуқларидан ёки гаров хатлари бўйича ҳуқуқлардан компания фойдасига воз кечган ҳолда кредит ажратади.
Ўз навбатида, компания тижорат банклари билан ҳуқуқлари аввал компанияга ўтказиб берилган ипотека кредитига хизмат кўрсатиш шартномасини ёки гаров хатларини ишончли бошқарувга бериш шартномасини тузади. Банклар қарз олувчилар ва ипотека берувчилар томонидан кредит шартномалари ва ипотека шартномаларининг компания фойдасига лозим даражада бажарилишини таъминлайди.
2021 йил декабрь ойида ипотека кредитлари имконлилиги бўйича жаҳон рейтингида Ўзбекистон ўрганилган 111 давлат орасида 104-ўринни эгаллагани хабар қилинганди. Ўртача ипотека тўловлари бир нафар оила аъзосининг ўртача даромадидан 3,5 баравар кўпроқни ташкил этади.
