Ўзбекистон Малайзиянинг Petroliam Nasional Bhd (Petronas) компанияси билан биргаликда газни қайта ишлаш бўйича иккита йирик лойиҳани амалга оширишни режалаштирмоқда. Бу ҳақда инвестициялар, саноат ва савдо вазири Лазиз Кудратов «Ўзбекистон 24» телеканалининг «Менимча» кўрсатувига берган интервьюсида маълум қилди.
«Биз йирик нефть ва кимё компанияси Petronas билан иккита катта лойиҳани амалга оширишга келишиб олдик. Биринчиси МТО технологияси, газимизни чуқур қайта ишлаш ва газдан полимерлар ишлаб чиқаришга асосланган. Иккинчиси — газдан „яшил“ аммиак ишлаб чиқариш лойиҳаси. АҚШ ва Европа давлатларида „яшил“ ўғитларга талаб ортиб бормоқда, шу боис экспорт бўйича бу бизнинг иқтисодиётимиз учун жуда муҳим лойиҳа», — деди у.
Малайзия бош вазири Анвар Иброҳим Шавкат Мирзиёевнинг таклифига биноан 17−19 май кунлари расмий ташриф билан мамлакатда бўлди. Бу Малайзия раҳбариятининг сўнгги 16 йил ичида Ўзбекистонга илк ташрифи бўлди.
Раҳбарлаи қўшма баёнотда Petronas компаниясининг нефть-газ соҳасида кадрлар тайёрлаш бўйича салоҳиятли иштирокини олқишлади.
2013 йил ўрталарида Малайзия компанияси Сурхондарё вилоятидаги Бойсун инвестицион блокидаги конларни қидириш ва ўзлаштириш бўйича маҳсулот тақсимоти ва ва Устюрт ҳудудининг Урга, Қуаниш ва Ақчалак гуруҳини ривожлантириш бўйича келишувдан чиқиш қарори ҳақида хабар берганди (лойиҳа ҳозирда Surhan Gas Chemical Operating Company томонидан амалга оширилмоқда). 2014 йилда компания Ўзбекистондаги ваколатхонасини ёпган.
2009 йилда компания синтетик ёнилғи ишлаб чиқариш заводини (Uzbekistan GTL) қуриш лойиҳасини амалга оширган, бироқ 2011 йил июнь ойида қўшма корхонадаги улушини 33,3 фоиздан 11 фоизга камайтирган, кейин эса бошқа инвесторлар билан биргаликда иқтисодий мақсадга мувофиқ эмаслиги сабабли лойиҳа таркибидан чиққан.
