12 март куни Европа парламенти (ЕП) Европа Иттифоқи санкцияларини айланиб ўтганлик учун жиноий жавобгарликка тортувчи қонунни маъқуллади. Ташаббусни 543 депутат қўллаб-қувватлади, 45 нафари қарши овоз берди, яна 27 нафари бетараф қолди, дейилади ЕП сайтида.
Ҳужжат иттифоққа аъзо барча давлатларда ЕИ санкцияларини қўллашни «уйғунлаштириш» учун қабул қилинган. Энди қонун Европа кенгаши томонидан тасдиқланиши керак. Кейин ЕИ мамлакатларига уни амалда қўллаш учун бир йил вақт берилади.
«Янги қонун қонунбузарликларнинг изчил таърифларини ўрнатади, бу, жумладан, маблағларни музлатиб қўймаслик, саёҳат тақиқлари ёки қурол-яроғ эмбаргосига риоя қилмаслик, санкцияланган шахсларга пул маблағларини ўтказиш ёки санкцияланган мамлакатларнинг давлат корхоналари билан бизнес юритишни ўз ичига олади. Санкцияларни бузган ҳолда молиявий хизматлар ёки юридик маслаҳатлар кўрсатиш ҳам жазога тортиладиган жиноятга айланади», — дейилади хабарда.
Жисмоний шахслар санкцияларни бузгани ё четлаб ўтгани учун ЕИнинг барча мамлакатларида беш йилгача қамоқ жазосига тортилади. Компанияларга эса жарима қўлланади.
«Россия босқинидан Европадаги қонунбузар жиноятчилар фойда кўради…Бизга бу қонун керак, чунки турли миллий ёндашувлар заифлик ва бўшлиқлар яратди», — деди Европарламентнинг махсус маърузачиси Софи ин’т Велд.
Қонун, шунингдек, Россиянинг музлатилган хусусий активларини суд қарори билан мусодара қилишга рухсат бериши кутилмоқда.
Февраль бошида ЕИ Украинага босқиннинг икки йиллиги муносабати билан Россияга қарши 13-санкция пакетини тасдиқлаган эди.
