Европа Иттифоқи кенгаши Украинага босқинининг икки йиллиги арафасида Россияга қарши 13-санкция пакетини маъқуллади.
«Бугун биз Россия ҳарбий ва мудофаа секторига нисбатан чеклов чораларини янада кучайтирмоқдамиз, учинчи мамлакатлардаги ускуна етказиб берувчи янги корхоналарни, шунингдек, украиналик болаларни ноқонуний депортация қилишга жавобгарларни нишонга оламиз», — деди Европа дипломатияси раҳбари Жозеп Боррелль.
Чекловлар Украинанинг ҳудудий яхлитлиги, суверенитети ва мустақиллигига таҳдид солувчи ҳаракатлар учун жавобгар бўлган 106 нафар жисмоний ва 88 нафар юридик шахсга нисбатан жорий этилди. Бундан ташқари, санкциялар Шимолий Кореядан қурол етказиб бериш билан шуғулланувчиларга, шунингдек, украиналик болаларни ноқонуний депортация қилиш ва ҳарбий қайта ўқитишга масъул бўлганларга ҳам қаратилган.
Умуман олганда, ЕИ санкциялари ҳозирда 2000 дан ортиқ жисмоний ва юридик шахсларга нисбатан қўлланади.
ЕИ Россия ҳарбий-саноат комплексини бевосита қўллаб-қувватловчи 27 ташкилотга қарши қаттиқроқ экспорт чекловлари жорий қилди. Ушбу компанияларнинг баъзилари учинчи мамлакатларда (Ҳиндистон, Шри-Ланка, Хитой, Сербия, Қозоғистон, Таиланд ва Туркия) жойлашган ва савдо чекловларини четлаб ўтиш билан шуғулланади, бошқалари — Россия ҳарбий-саноат комплекси учун бутловчи қисмлар яратиш, ишлаб чиқариш ва етказиб бериш билан шуғулланадиган Россия корхоналари ҳисобланади, дейилади хабарда.
ЕИ, шунингдек, «Россия мудофаа секторини технологик яхшилашга ҳисса қўшиши мумкин бўлган» тақиқланган товарлар рўйхатини кенгайтирди. Хусусан, рўйхатдан дронлар ишлаб чиқиш ва ишлаб чиқариш учун компонентлар жой олган.
Бундан ташқари, ЕИ маъмурлари «Россиянинг саноат салоҳиятини мустаҳкамлашга ҳисса қўшадиган» товарлар, масалан, электр трансформаторлари экспортига чекловлар киритди.
- ЕИнинг Россияга қарши санкциялари 12-пакети 2023 йил декабрида қабул қилинганди. У Россиядан заргарлик буюмлари олмосларини олиб киришни, шунингдек, ўта нозик товарлар ва технологияларни реэкспорт қилишни тақиқлашдан иборат эди.
