Швеция 7 март куни расман Шимолий Атлантика альянсининг (НАТО) 32-аъзосига айланди. Аъзолик ҳақидаги протокол АҚШ Давлат департаменти томонидан эълон қилинди. 11 март куни НАТОнинг Брюсселдаги қароргоҳи олдида Швеция байроғини кўтариш маросими бўлиб ўтади.
Протоколдан скрин.
АҚШ президенти Жо Байден Конгрессда «Мамлакатнинг ҳолати ҳақида»ги нутқида Швециянинг иттифоққа қўшилишини эълон қилиши кутилмоқда. Оқ уй баёнотида айтилишича, тадбирга Швеция бош вазири Ульф Кристерссон таклиф этилган.
Февраль ойи охирида Венгрия парламенти Швециянинг НАТОга аъзо бўлиш бўйича берган аризасини ратификация қилганди. Венгрия Стокгольм аризасини маъқуллаган НАТОнинг сўнгги аъзоси бўлди.
«Швециянинг 200 йиллик бетарафлик ва ҳарбий блокка қўшилмаслик сиёсати якунига етмоқда. Биз ўзлигимизни ва ўзимиз ишонадиган барча нарсани яхшироқ ҳимоя қила олиш учун ҳам НАТОга қўшилмоқдамиз. Биз бошқалар билан биргаликда эркинлигимиз, демократиямиз ва қадриятларимизни ҳимоя қиламиз», — деди Кристерссон.
- Швеция ва Финляндия 2022 йил май ойи ўрталарида Россиянинг Украинага кенг кўламли босқини фонида НАТОга аъзо бўлиш учун ариза топширган эди. Бунгача иккала давлат ҳам ҳарбий иттифоқларда қатнашишдан қочган. Финляндия 2023 йил апрель ойида альянсга аъзо бўлганди.
