22 февраль куни Халқаро футбол федерацияси (ФИФА) Тартиб-интизом қўмитаси Ўзбекистоннинг «Бунёдкор» клуби ҳамда 2010 йиллар охирида Тошкент клубида тўп сурган бразилиялик футболчилар Ривалдо ва Денилсон ўртасидаги узоқ муддатли молиявий келишмовчилик юзасидан қарор қабул қилди.
Tribuna.uz спорт сайти хабарига кўра, ФИФА Ўзбекистон футбол ассоциациясига «Бунёдкор»ни Ривалдодан 8,16 миллион евро, Денилсондан эса 1,11 миллион доллар қарзни тўлаш мажбурияти қайд этилган қарорни юборган. «Газета.uz»га маълумотни ЎФАдаги манба тасдиқлади ва у ҳам ассоциация фақат билдиришнома олганини, лекин у клуб ишларига аралашмаслигини таъкидлади.
Қарорга кўра, «Бунёдкор» клуби ФИФАнинг низоларни ҳал қилиш бўйича Миллий палатасининг (NDRC) 2017 йил 21-сентябрдаги қарорини тўлиқ бажармаганликда айбдор деб топилди. Буни Спорт арбитраж суди (CAS) 2023 йил 6 ноябрда тўлиқ тасдиқлаган.
Тошкент клуби Ривалдо Витор Борба Феррейрага жами 8,16 миллион евро (Марказий банкнинг 26 февралдаги курси бўйича 110,3 миллиард сўм) тўлаши шарт:
- 2 489 947 евро — клуб томонидан футболчига тўланмаган ва йиллик 5 фоиз бонус;
- 5 664 000 евро — шартноманинг бекор қилиниши муносабати билан товон пули ва йиллик 5 фоиз бонус;
- 10 минг Швейцария франки — ҳакамлик муҳокамаси харажатлари учун компенсация.
Денилсон Мартинс Наскименто олдидаги мажбуриятлар — жами 1,11 миллион доллар (13,88 миллиард сўм):
- 700 минг доллар — клуб томонидан бразилияликга тўланмаган бонуслар ва йиллик 5 фоиз бонус;
- 400 минг доллар — шартнома шартларини бузганлик учун компенсация ва йиллик 5 фоиз бонус.
- 10 минг Швейцария франки — ҳакамлик муҳокамаси харажатлари учун компенсация.
Қайд этилишича, ФИФА бу суммани тўлаш учун «Бунёдкор»га 30 кун муддат берган. Акс ҳолда, ташкилот «тегишли чоралар» кўради. Тошкент клуби ҳам 30 минг Швейцария франки миқдорида жаримага тортилди.
Эслатиб ўтамиз, Ривалдо 2008−2010 йилларда кейинчалик номини «Бунёдкор»га ўзгартирган «Қурувчи» клубида тўп сурган ва 61 учрашувда 37 та гол киритиб, уч марта Ўзбекистон чемпиони бўлган. У 1999 йилги «Олтин тўп» соҳиби, ФИФА талқинига кўра йилнинг энг яхши футболчиси унвони, икки марта Испания чемпионати, Испания кубоги ва UEFA Суперкубоги ғолиби. Футболчи фаолияти давомида «Депортиво», «Барселона», «Милан» ва бошқа жамоаларда ўйнаган.
Денилсон 2010 йилда «Бунёдкор»га келган ва ўша мавсумда Ўзбекистон чемпионлигини қўлга киритган, Олий лигада 14 та ўйинда 4 та, Осиё чемпионлар лигасида эса 6 та ўйинда 5 та гол урган.
«Қурувчи» клуби «Zeromax» холдинг компанияси таркибига кирувчи «Нефтегазмонтаж» компанияси томонидан ташкил этилган.
Ривалдо дастлаб «Бунёдкор» билан бир йиллик шартнома имзолаган. Унинг бир йиллик шартномаси солиқдан ташқари 6 миллион евро (5,3 миллион фунт) ва унинг образидан фойдаланиш ҳуқуқи шартномаси эди, бу унга бошқа даромадларнинг 26 фоизини берди, яъни у биринчи йили атрофида 7,1 миллион фунт стерлинг ишлаб олди.
Бироқ, 2008 йилнинг ёзида шартнома имзолаганидан бир неча ой ўтгач, у келишувни яна икки йилга, 2011 йилнинг ёзигача узайтиришга рози бўлди, шунингдек, маслаҳатчи вазифаларни ҳам бажарди.
Sporting Intelligence ёзишича, «биринчи йили ҳаммаси яхши бўлиб туюлди, «Бунёдкор»да аниқ пул кўп эди». Клуб Зикони (2008−2009), кейин эса Фелипе Сколарини (2009−2010) мураббийликка олди, шунингдек, Самуэл Это`Они 25 миллион доллар эвазига бир мавсумга ўз сафига қўшишга таклиф қилди, бироқ у рад этди. Шунингдек, клуб «Барселона»нинг таниқли испан футболчилари, жумладан, Андрес Инеста, Карлес Пуёл ва Сеск Фабрегасга Тошкентга мураббийлик семинарлари ва маҳорат сабоқларида қатнашишлари учун ҳар бирига 1 миллион доллар тўлаган.
Ривалдонинг иккинчи йили, 2009 йилнинг ёзидан бошлаб, футболчиларга маош тўлаш тўхтатилди. «Унга жиддий муаммо йўқ, фақат пул оқими билан боғлиқ муаммо айтилган ва бу ғайриоддий туюлган бўлсада, у хавотирга сабаб йўқ деб ўйлаган», — деди унинг адвокати.
Адвокатнинг сўзларига кўра, маошлар бир йил берилмаган, бироқ клубга бир неча ёш бразилиялик ва бошқа ходимларни таклиф қилган Ривалдо «уларнинг фаровонлиги учун масъулиятни ҳис қилган, шунинг учун у уларга ғамхўрлик қилиш учун қолган ва маошларини ўз чўнтагидан тўлаган».
«Менда катта режалар бор эди. Мен клуб дунё футбол харитасида кўриниб туриши учун ривожланишини истардим. Мен «Бунёдкор»нинг ўйинини яхшилашни, машғулотлар сифатини оширишни ва клубни янги профессионал даражага олиб чиқишни хоҳлардим. Мен «Бунёдкор»дан одамларни «Челси», «Интер» ва «Милан»га юбордим, шунда улар Европанинг муваффақиятли клуби нима эканлигини ичкаридан кўришлари мумкин», — дея афсусда бўлди бразилиялик спортчи Sporting Intelligence нашрига берган интервьюсида.
2010 йил июлига келиб, Ривалдо судга мурожаат қилишга қарор қилди, худди шу вақтда «Zeromax» банкрот бўлди. Футболчи йўқотишларини 16 миллион еврога баҳолаган. Унинг сўзларига кўра, у ушбу сумманинг камида бир қисмини тўлашга ҳаракатда.
