Нью-Йорк суди АҚШнинг собиқ президенти Дональд Трампни фуқаролик фирибгарлиги иши бўйича айбдор деб топди ва унга 355 миллион доллар жарима солди, деб хабар бермоқда CNN. Жами жарима суммаси қўшимча фоизлар билан 450 миллион доллардан ошиши кутилмоқда.
Шунингдек, Трампга Нью-Йоркда рўйхатдан ўтган ҳар қандай корпорацияда, жумладан, унинг оилавий холдинги Trump Organization`да раҳбарлик лавозимларини эгаллаши ҳам уч йилга ман этилди.
Бу ишда Трампнинг икки ўғли Дональд ва Эрик ҳам айбланувчи бўлган. Суд уларни «кўплаб фирибгарлик ҳолатлари учун жавобгар» деб топди ва уларнинг ҳар бирини 4 миллион доллардан жаримага тортди. Бундан ташқари, уларга икки йил муддатга давлат корхоналарида раҳбарлик лавозимларида ишлаш тақиқланди.
Нью-Йорк бош прокурори Летитиа Жеймс томонидан берилган даъво судланувчиларни янада қулайроқ банк кредитлари олиш учун 2022 йил учун молиявий ҳисоботларни сохталаштиришда айблади.
Шу билан бирга, суд Трампнинг бизнес лицензияларини бекор қилмади, бу эса Америка ОАВлари ёзганидек, унинг бизнесига чек қўйиши мумкин эди. Бироқ суд қарори Трампга «жиддий молиявий зарба» ва «унинг миллиардер имиджига рамзий зарба бўлди», деб таъкидлади New York Times.
«Трамп ва унинг шерикларида қилмишдан пушаймонликнинг тўлиқ йўқлиги патология билан чегараланади. Айбланувчилар қотиллик ёки ўт қўйишни содир этмаган, <...> аммо улар ўз хатосини тан олмайди», — дейилади суд қарорида.
Сиёсатчи суд қароридан ғазабланган. «Ҳаммаси [Жо] Байденга боғлиқ. Бу унинг сиёсий рақибига қарши жодугар ови, буни мамлакатимиз ҳеч қачон кўрмаган», — деди Трамп.
Трампнинг адвокатлари апелляция бериш ниятида эканликларини айтишди. Уни кўриб чиқиш узоқ вақт талаб қилиши мумкин, деб таъкидлайди CNN.
- Бугундан бошлаб яна АҚШ президентлигига интилаётган Трампга нисбатан унинг бизнес ва сиёсий фаолияти билан боғлиқ камида тўртта алоҳида жиноий иш очилди, деб ёзади New York Times. Гап Жоржияда 2020 йилги сайлов натижаларини бекор қилишга уриниш, 2021 йил январида Капитолийга бостириб кириш, махфий ҳужжатлар билан ноқонуний муомала қилиш ва президентлик сайловолди кампанияси маблағларини ноқонуний сарфлаш ҳақида кетмоқда.
- Умуман олганда, Трампга 90 дан ортиқ моддалар бўйича айблов қўйилган. Молиявий фирибгарлик бўйича биринчи суд жараёни 25 март куни бошланади.
- 2022 йилнинг ноябрида Трамп бўлажак сайловларда Республикачилар партиясидан президентликка номзодини қўйишини эълон қилди. Сўровлар шуни кўрсатадики, Қўшма Штатларнинг собиқ раҳбари, унга қарши жиноий иш очилганига қарамай, республикачилар орасида фаворит бўлиб қолмоқда.
