Ўзбекистонда тармоқдаги тақчиллик туфайли электр энергияси етказиб беришда чекловлар жорий этилмоқда, дея хабар берди душанба куни бўлиб ўтган брифингда Энергетика вазирлиги матбуот котиби Ҳасан Тошхўжаев.
Якшанба куни (18 февраль) барча электр станцияларида 231,4 миллион кВт/соат электр энергияси ишлаб чиқарилди. Бунинг учун иссиқлик электр станцияларида 40,3 миллион куб метр табиий газ, 26,3 минг тонна кўмир ва 10,7 минг тонна мазут ёқилди.
Шунингдек, Туркманистондан 21,6 миллион кВт/соат электр энергияси импорт қилинди.
«Шунга қарамай, кеча электр энергияси етказиб бериш бўйича дефицит 6,4 млн кВт·соатни ташкил этиб, мамлакатимиз бўйлаб куннинг тиғиз вақтида 400 МВтгача чекловлар киритилишига мажбур бўлинди», — деди у.
Республика бўйича истеъмолчиларга 225,6 миллион кВт/соат электр энергияси етказиб берилди. Газ истеъмоли 151,6 миллион куб метрни ташкил этди, деб таъкидлади Энергетика вазирлиги.
Вазирлик матбуот хизматининг «Газета.uz»га ойдинлик киритишича, абонентларга бунинг таъсирини камайтириш мақсадида, аввало, иқтисодиётга жиддий таъсир кўрсатмаётган корхоналар тармоқдан узилмоқда. Бироқ чекловлар 50 минг абонентга тегишли.
Вазирлик, шунингдек, Бухоро вилоятида юз берган кучли шамол туфайли 110 кВ кучланишга эга «Л-Газли-1» ҳамда «Л-Газли-2» электр узатиш тармоқларининг авариявий ўчиши оқибатида «Газли» компрессор станциясидаги 8 та ҳамда «Газли» газни қайта ишлаш заводига қарашли «Учқир» компрессор станциясидаги 2 та газ ҳайдаш агрегати фавқулодда тўхтаганини маълум қилди. Оқибатда барча ёнилғи қуйиш шохобчалари вақтинча ёпилган. Таъмирлаш ишлари тез орада якунланиши режалаштирилган.
Ноябрь ойи охирида энергетика вазири Жўрабек Мирзамаҳмудов жорий қишда юзага келиши мумкин бўлган энергия ресурслари тақчиллигини қандай қоплашни режалаштираётгани ҳақида гапирганди. Ўшанда мазутдан электр ишлаб чиқариш, йирик корхоналарни тунги иш режимига ўтказиш, АГТКШларга газ етказиб беришни қисқартириш режалар сирасига киритилганди.
«Газета.uz» аввалроқ Ўзбекистон қандай қилиб газ экспорт қилувчи давлатдан импорт қилувчи давлатга айланиб қолганини ўрганганди.
